Құжат жетілдіріле түсті

ҚР Парламент Мәжілісі теміржол көлігі мәселелеріне қатысты заң жобасына енгізілген түзетулерді қарады. 20 қарашадағы Мәжілістің жалпы отырысында «ҚР кейбір заңнамалық актілеріне темір жол көлігі мәселелері бойынша өзгерістер мен толықтырулар енгізу туралы» Заң жобасы бірінші оқылымда мақұлданды.

ҚР Индустрия және инфрақұрылымдық даму министрі Бейбіт Атамқұлов заң жобасын таныстырды. Оның айтуынша, бұл құжат Мемлекет басшысының Жолдауда айтқан теміржол тасымалында тарифті белгілеудің ашықтығын күшейту және тұтынушылардың құқықтарын қорғауды қамтамасыз ету қажеттілігі туралы тапсырмасын жүзеге асыру мақсатында жасалған.

– Негізгі жаңалықтар жолаушылар тасымалын субсидиялаудың ашық жүйесін құруға, жүк жөнелтушілердің жасырын транзит схемаларын пайдалануын болдырмауға және кірме жолдар қызметтерін тұтынушылардың құқықтарын қорғауға бағытталған. Атап айтқанда, жолаушылар қозғалысында локомотив тартымының жеке операторын құру арқылы жолаушы тасымалдаушыларды мемлекеттік бюджеттен субсидиялау механизмі өзгертіліп, ол бюджет қаражатының тікелей алушысы болады, – деді министр.

Бұл теміржол жолаушылар тасымалын қолдауға мемлекеттік субсидиялар бөлу рәсімдерін жеңілдетуге мүмкіндік береді және барлық іске қосылған компаниялардың шығыстары мен кірістерінің ашық есебін жасайды. Сондай-ақ, заң жобасында жасырын транзит схемасы бойынша жүк тасымалдау мүмкіндіктерін алып тастау бойынша нормалар көзделген, бұл ҚР-ның Орталық Азия елдері арасындағы транзиттік оператор ретіндегі позициясын күшейтуге мүмкіндік береді.

Түзетулердің жеке бөлігі кірме жолдар қызметтерін тұтынушылардың құқықтарын қорғауға бағытталған. Осылайша, алдағы уақытта қызметтерді тұтынушылар кірме жолдар иелерінің заңсыз, үстем және монополистік әрекеттерінен заңнамалық деңгейде қорғалатын болады. Айта кету керек, жаңа құжат жүк жөнелтушілердің компанияларына оң әлеуметтікэкономикалық әсер етеді деп болжауға болады, транзиттік тасымалдардан түсетін кірістердің өсуін болжайды және бюджеттен қосымша қаражат бөлінбейді.