Коронавирус қауіпсіздігі: қашықтан жұмыс істеуге көшті
![](https://rail-news.kz/uploads/posts/2020/3/20/1584674266448.jpg)
«ҚТЖ» ҰК» АҚ Басқарма төрағасының бірінші орынбасары Қанат Әлмағамбетовтың төрағалығымен бүгінгі күннің ахуалына байланысты селекторлық кеңес өтті. Оған өңірлердегі жол бөлімшелерінің басшылары қатысты.
ҚР Президентінің 2020 жылдың 15 наурыздағы «Қазақстан Республикасында төтенше жағдайлар енгізу туралы» Жарлығына сәйкес және «ҚТЖ» ҰК» АҚ қызметкерлері арасында COVID-19 коронавирус індеті таралуының алдын алу мақсатында компания басшылығының арнайы бұйрығы шығарылып, сонымен қатар аталған індет пандемиясына байланысты төтенше жағдайды басқару жөніндегі штаб құрылғанын хабарлаған Қанат Әлмағамбетов осыған орай кейбір категориядағы қызметкерлер қашықтан жұмыс істеу формасына ауыстырылып жатқанын жеткізді. Олар - зейнет және зейнеталды жастағы, созылмалы аурулары бар азаматтар, жүкті әйелдер, көпбалалы ата-аналар. Сондайақ үйінде отырып жұмыс істеу құқына ие, үш жасқа дейінгі балалары бар, балаларын жалғыз тәрбиелеуші және қарауында мүгедек баласы немесе зейнет жасындағы қарттары бар компания қызметкерлері екен.
– Пайдаланылмаған еңбек демалысы бар қызметкерлер негізгі жұмысына нұқсан келтірместен демалысқа кете алады. Сондайақ бұйрықта компанияның әкімшілікбасқарушылық құрамы үшін ыңғайлы жұмыс кестесіне көшіру жайы қарастырылған. Қызметкерлердің ҚР аумағы бойынша және одан тыс жерлерге жолсапарлары алынып тасталды, – деп мәлімет берді Қанат Әлмағамбетов.
Селекторлық кеңесте сонымен қатар, барлық теміржол қызметкерлеріне коронавирус індеті таралуын болдырмау мен алдын алу бойынша ұсыныстарды қатаң ұстануы бұйырылды. Соның ішінде жеке гигиеналық сақтықты күшейту, қолды үнемі жуып жүру, жұмыс орындарында қолғап пен медициналық бетпердені барынша пайдалану, т.б. шараларды сақтау - міндет.
– Жедел респираторлы вирустық инфекцияның белгілері пайда болған кезде жұмысқа шығуға болмайды. Тікелей басшыны хабардар ету жеткілікті. Толық жазылғанға дейін сырқат парақшасын ашу үшін дереу дәрігерге жүгіну керек. Осы ақпаратты өз ұжымыңыздың барлық мүшесіне жеткізіңіздер, өз өңірлеріңізде ТЖ режимін енгізгенге дейін күтпеңіздер, қазірден бастап шара қабылдаңыздар, – деді Қанат Әлмағамбетов.
Бұл ретте ол жұмыс орнында барынша физикалық байланыстарды шектеу қажеттігін, соның ішінде мысалы қол беріп амандасу, құшақтап көрісу сынды байланыс формаларынан бас тартуды, қажетті жағдайда шетелдік азаматтармен іскерлік келісім-шарттарды телефон немесе бейнебайланыс режимінде жүргізуді ұсынды. Айта кетейік, коронавирус пандемиясының жариялануына орай елімізде енгізілген төтенше жағдайға байланысты бүгінгі таңда еліміздегі жолаушылар пойыздарында, әр рейстен кейін оларды жуу мен зарарсыздандыру құралдарын пайдаланып өңдеу, санитарлықпрофилақтикалық режим күшейтілді. Бүгінгі күнге дейін коронавирус індетінің теміржолшылар арасында таралу дерегі тіркелген жоқ.