«Жасыл дәліз» жобасы: ішкі тасымалға серпін берді
Абай облысы бойынша меншікті тілші
Еліміз бойынша енгізілген карантиндік жағдайда теміржол саласы жүк тасымалында ҚР Президенті Қасым-Жомарт Тоқаевтың күшейтілген шектеулер кезеңінде әлеуметтік маңызы бар тауарлар тасымалына арналған «Жасыл дәліз» жобасын кеңейту туралы тапсырмасы өзгеше серпін беруде.
Мысалы, соның нәтижесінде Семей ЖТ бөлімшесіндегі логистикалық мәселелер оң шешімін тауып жатыр. Яғни, ел шығысын азық-түлік өнімдерімен және жанаржағармаймен қамту бойынша автокөлік пен теміржолдағы жүк тасымалында іркіліс жоқ.
Қазіргі күні бөлімше бойынша жолаушылар пойыздары толық тоқтатылғанымен жүк пойыздары үшін шектеу жоқ. Әрине, Семей ЖТ бөлімшесінде құрастырылып, алыс-жақын шетелге жөнелтілетін жүк көлемі жылдағы осы мерзіммен салыстырғанда анағұрлым төмендеген. Оған жаһанды жайлаған індет салдарынан бірінші кезекте экспорттық импорттық операциялардың азаюы себеп болып отырғаны да белгілі. Мәселен, шетелге астық өнімдерін шығаруға шектеу қойылғалы бері қаладағы зауыттардан Орта Азия елдеріне ұн тиеп жөнелту көлемі де шектелді. Сонымен қатар, Қытай елімен арадағы орнаған уақытша шектеулерге байланысты да жүк көлемі азайған.
«Соған қарамастан бүгінгі таңда бөлімше бойынша негізінен транзиттік пойыздар көптеп өтуде. Көршілес Ресейдің Сібір бөлігінде құрастырылып, Иран, Пәкістанға жөнелтілетін пойыздар саны тәулігіне ең кемі 4-5 жылжымалы құрам болады. Ол транзиттік жүк пойыздарын қабылдап-жөнелтуде станциялар басында бұрынғыдай қарбалас та жоқ», - дейді бұл ретте бөлімшенің логистика саласының мамандары. Дегенмен, теміржолшылардың тілімен айтқанда «үй жұмысы» басты орынға шықты. Атап айтсақ, қазіргі таңда бөлімшеге қарасты Жаңа-Семей станциясында тәулігіне ең аз дегенде 6-7 жүк пойызы құрастырылып жолға шығарылуда. Қаладағы кейбір кәсіпкерлерге төтенше жағдай барысында да жұмыс істеуге рұқсат берілген болатын. Осылайша, ішкі тасымал бойынша қозғалыс барысы үзіліссіз жүргізілуде. Негізінен тиелетін тауар түрі – ұн. Бірінші кезекте тұтынылатын тауарлар қатарындағы өнімнің бұл түріне соңғы айларда ел бойынша сұраныс күрт артқан. «Жасыл дәліз» жобасы сәуірдің 18-і күні орын алған облыс көлемі бойынша енгізілген карантиндік шектеулерге байланысты кеңейтілді. Соның аясында бөлімше бойынша түсіріліп жатқан жүк түрінің басым бөлігін азық-түлік өнімдері құрайды. Әсіресе, сүт, жарма өнімдері мол көлемде түсірілуде.
Келіп жеткен тауарлар осынау бірегей жоба аясында алыс аудандар мен шалғайдағы шағын қалаларға ауыр жүк көліктерімен жеткізіледі. Сондай-ақ, аграрлық салаға маманданған аудан-қалалардағы серіктестіктердің, шаруашылықтардың тапсырысы бойынша жанармай өнімі де көптеп жеткізілуде. Жүктердің бұл түрлері бойынша сәуір айында тіпті өсім де байқалған. «Жасыл дәліз» жобасының ішкі тасымалды өсіріп отырғаны даусыз. Ал, жүк тиеу мен 6 мың тонналық ауыр салмақты пойыздарды құрастыруда негізгі күш бөлімшедегі ЖаңаСемей жүк станциясына түсіп тұр. Ертіс үстіндегі 90 жылдан аса тарихы бар теміржол көпірінің күрделі жөндеуден өтіп жатуына байланысты Дегелең, Локоть, Семей, Шар станцияларынан келетін вагондардың басым көпшілігі осында сұрыпталып, жасақталады. Айта кетерлігі сол, осыған дейін бөлімше бойынша салмағы 9 мыңға дейін жететін 60 ауыр салмақты пойыздар құрастырылып жолға шығарылған болатын. Қорыта айтқанда, ішкі тасымал бойынша логистикалық шаралар тың жоспар аясында сәтімен жүзеге асырылуда.