Қауіпсіздік талаптары қатаң тексерілді

1 маусымнан бастап жолаушы тасымалы жандана бастағаны аян. Пойыздар жүрмес бұрын оған жанжақты дайындық жасалып, қауіпсіздік талаптары қатаң тексерілді.

Мысалы, Қызылорда вокзалында «Nur Otan» партиясы Қызылорда облыстық теміржол филиалы қызметкерлері оның пандемия жағдайындағы қызметімен танысып, дайындығын тексерді.

Вокзал кіреберісінде жолаушылардың дене қызуы тексеріліп, ғимарат ішінде санитайзер қойылған. Қызметкерлердің барлығы маска, қолғаппен қызмет көрсетеді.

Вокзалдағы барлық бөлмелер дезинфекциялық құралдармен зарарсыздандырылған. Қашықтықты сақтауды көрсететін белгілер орнатылған. Сондай-ақ, вокзалда медициналық пункт пен карантин аймағы қарастырылған.

Мұнда дене қызуы көтерілген жолаушылар тексеріледі. Осының барлығы жолаушылар тасымалын барынша қауіпсіз тасымалдауға мүмкіндік беретін болады.

Ал 1 маусымнан бастап республика бойынша 54 жолаушылар пойызы іске қосылғаны белгілі. Оның ішінде Қызылорда облысы орталығынан жүретін 5 жұп: №21/22 «Семей-(Алматы)-Қызылорда-Семей», №55/56 «Көкшетау-Қызылорда-Көкшетау», №75/76 «Петропавл-Қызылорда-Петропавл», №117/118 «Қызылорда- (Жезқазған)-Нұр-Сұлтан-1-Қызылорда» және №6843/6844 «Қызылорда-Бесарық-Түркістан» пойыздары жүре бастады.

Барлық жолаушылар тасымалы санитарлық-дезинфекциялық талаптардың қатаң сақталуымен орындалатын болады. Бұл ретте, жолаушылар сапарға шығу үшін термометриялық процедурадан өтеді. Темір жол вокзалына және Әуежай ғимаратына тек жолаушылар ғана жіберіледі.

Сондайақ, жолаушылар отырғызу/түсіру кезінде 1,5-2 метр қауіпсіз әлеуметтік арақашықтықты сақтауы қажет. Жолға шығарда жолаушының міндетті түрде өзімен бірге жеке қорғаныс құралдары – бетперде, санитайзер болуы тиіс.

Теміржолшылар жолаушыларды тиісті санитарлық дезинфекциялық талаптарды орындай отырып, карантин режимін сақтауға шақырады.