Жаз - жолаушы маусымы

Жаз маусымы – халықтың демалыс алып, әрі-бері сабылып, жолаушылар ағынының көбейетін кезі. Елімізде орын алған карантиндік жағдайға қарамастан биыл да демалушылар легі аз емес көрінеді. Бір айдан аса уақыт тоқтап қалған пойыздар қозғалысы қайта іске қосылып, халық билет сатып алуға лап қойғаны сөзіміздің дәлелі болса керек. 

Пойыздар қозғалысы іске қосылған 1 маусымнан күні бүгінге 645 мың адам билет сатып алған.

Соның ішінде жаз демалысына шығып саяхаттаушылар қатары аз емес.

Айта кетерлігі, биыл жылдағыдай Түркия немесе Дубай асып шет елде демалушылар күрт азайып, оның орнына отандық демалыс аймақтарына барушылар көбейген.

«Жолаушы тасымалы» АҚ Алакөл курортты аймағына қатынайтын бірнеше ірі қаладан шағын құрамдар шығарып отырғаны туралы хабарлағанбыз.

Алакөл курортты аймағына пойызбен жолаушы халық Алматы бөлімшесінің шекарасында орналасқан Жалаңашкөл станциясына дейін барады.

Магистральдық желі дирекциясы директорының вокзал шаруашылығы жөніндегі орынбасары Абай Досановтың мәліметінше, осыған орай Магистральдық желі бөлімшесінің вокзал шаруашылығы ол жерде күн мен желден, жаңбырдан қорғанатындай төбесі жабық аялдама іспеттес ықтасын орын-жай салуды қарастырып жатыр екен.

Сондай-ақ, Жалаңашкөлде платформаны ұзарту жұмыстары да қоса-қат жүргізіліп жатқан көрінеді. Бірақ, бұл станцияда вокзал салуға қажеттілік жоқ.

Неге десеңіз, бұл адам ағыны – тек маусымдық кезең. Ал қалған маусымдарда бұл жерде жолаушылар атымен жоқ деуге болады. Әрине, вокзалдар – әлеуметтік нысан әрі шығыны көп. Олардың күтімін жасап ұстап тұру үшін қыруар қаржы керек.

Қазақстан теміржолының өн бойындағы вокзалдар бір кездері жергілікті билік қарамағында болып, оларды ҚТЖ қайтарып алғаны белгілі. Ұлттық компания оларды жөндеп, бірқатарын жаңадан салып, қалпына келтірген соң бүгінде әкімдікке қайта өткізіп жатыр.

Себебі, барлық дамыған елдер тәжірибесіне сүйенсек, әлеуметтік нысан болған соң вокзалдар күтіміне кететін шығынға қаржыны жергілікті билік, қалалық бюджет бөледі.