Мақсат - персоналды тиімді басқару
«ҚТЖ» ҰК» АҚ-ның ең ірі бөлімшесі – Магистральдық желі дирекциясында 46 мыңнан астам теміржолшы еңбек етеді. Болат жолдың негізі болып табылатын құрылым – магистральдық, станциялық және арнайы жолдардан, бөлек пункттерден, станциялардан, сұрыптау құрылғыларын басқарудың автоматтандырылған жүйесінен құралады және мыңдаған шақырым темір жолдың бүтіндігі мен жарамдылығы үшін жауапты.
Өңірлік деңгейдегі магистральдық темір жол желісі нысандарына 96 дистанцияны қоса алғанда 26 филиал қызмет көрсетеді. Бүгінде мұнда «ҚТЖ» ҰК» АҚ-ның барлық мекемелеріндегі сияқты жұмысшы санын тиімді басқаруды жақсарту бағдарламасы іске асырылуда. Алайда, бұл жүздеген теміржолшылар бір мезетте жұмыссыз қалады деген сөз емес. Керісінше, компания басшылығы қызмет орны қысқаратын немесе жабылатын жұмысшыларды жалақысыз қалдырмау жолында нақты мақсаттар қойып отыр. Бірде бір теміржолшы күнкөріссіз қалмайтынын алға тартады.
– Жұмысшы санын тиімді басқаруды жақсарту жайлы айтқан кезде біз адамдарды жұмыс орындарынан айырып, нақты қысқартуды айтпаймыз. Иә, компания ұзақ уақыт жұмысы тоқтап тұруға келмейтін қозғалыс қауіпсіздігіне қатысты мамандықтарды қоспағанда сырттан жалдамалы адамдар алуға мораторий жариялады. Бұл босатылған жұмысшыларға ҚТЖ ішінен жұмыс ұсынуға жағдай жасайды. Сырттан адам алмау туралы мораторий да дәл сол мақсатты көздейді, – деп түсіндірді инфрақұрылым бойынша басқарушы директор – «ҚТЖ» ҰК» АҚ «Магистральдық желі дирекциясы» филиалының директоры Бауыржан Орынбасаров.
Филиал басшысының айтуынша, «ҚТЖ» ҰК» АҚ Магистральдық желі дирекциясында жаппай қысқартулар қарастырылмаған: «Керісінше, біз жоғарыда аталған мамандықтар бойынша мамандарды қабылдауды жалғастырып жатырмыз» дейді. Компанияның инфрақұрылым бойынша басқарушы директоры қол еңбегін алмастыратын жаңа технологиялар туралы да айтты. Сондай жобалардың бірі, мысалы, «Магистраль» АБЖ шеңберінде мобильді диагностикалық құралдарды енгізу» жобасы.
– Бұл ескірген, тиімділігі аз ақаутапқыш арбалардан автоматтандыру жүйесіне көшуге мүмкіндік береді. 2019 жылдың мамыр айынан бастап біз ақаулар мен ауытқулардың пайда болу қаупін анықтауда «адами факторды» мейлінше азайтуға тырысамыз. Жол шаруашылығының диагностикалық блогы 6 мобильдік диагностикалық кешеннің толығуы есебімен дамып жатыр. Олар теміржолды кешенді диагностикалауға және рельс табанының геометриясы жағдайын мониторингілеуге арналған. Үш мобильді диагностикалық жабдық 2019 жылы іске қосылды. Биыл жылдың басында үшеуін іске қосу мен жөндеу жұмыстары жасалды, – деп мәлімдеді Бауыржан Орынбасаров.
Көп адамдарға жаңашылдықтарға сенімсіздікпен қарау тән. Жолды ақаутапқыштар арқылы толықтай мониторингілеуге арналған мобильді диагностикалық кешенге қатысты да солай болды. Теміржолшылар уақыт өте келе МДК-ның тиімділігіне көз жеткізді.
«Магистраль» АБЖ шеңберінде мобильді диагностикалық құралдарды енгізу» жобасының бірінші кезеңін жүзеге асыру процесі кезінде ақаутапқыш арбасының 121 операторынан тек 1 ғана жұмысшы өтемақымен бірге еңбек шартын бұзуды таңдағанын атап айту керек.
Қалғандарының бәрі «ҚТЖ» ҰК» АҚ-да жұмысқа орналастырылды немесе зейнеткерлікке ерте шығу бағдарламасын пайдаланған (егер жұмысшының зейнеткерлікке шығуына 5 жыл немесе одан аз уақыт қалған болса және оның қызметі қысқартылып жатса, ол компаниядан ай сайын 70 мың мен 200 мыңның арасында жәрдемақы ала отырып кете алады). Ерекше айта кетерлігі – барлық ұсынылатын шаралар теміржолшылар кәсіподағымен келісіліп, жасалады.
– Темір жолда ең бастысы – тәртіп пен жүйелілік. Бізде жаңсақтыққа және «байқамай қалыппыз» деген қарабайырлыққа жол жоқ, себебі осының бәрінің артында адамдар өмірі тұр. Сондықтан әрбір маманға өте ыждаһаттылықпен қараймыз, себебі оның артында адам тағдыры тұр, – деді Бауыржан Орынбасаров. – Жалпы алғанда, темір жол инфрақұрылымы жол шаруашылығы, белгі беру және байланыс, электрмен жабдықтау қызметтерінен тұрады.
Соңғы жылдары транзиттік тартымдылықтың артуы мен жаңа темір жол желілерінің салынуымен байланысты инфрақұрылымдық жобалар кеңейе түсті. Олар темір жол желісінің оңтайлы кескіндемесін жасауға мүмкіндік берді.