Апатты жағдай орын алды
30 маусым күні түнгі сағат 01.30-да Шоқпар станциясына келген №2950 жүк пойызының 2 вагон-цистернасы жолдан шығып кетіп, апатты жағдай орын алды. 45 км/сағ жылдамдықпен 2-ші жолға келген құрамдағы жолдан тайған цистерна "HOLDING" РТС ЖШС жекеменшік компаниясына тиесілі. Апат салдарынан цистернадағы бензиннен өрт шығып, қауіпті жағдай туындаған.
Теміржолшылар қауіптің бетін қайтарып, үлкен шығынның алдын алу үшін барлық мүмкіндікті жасаған.
Оқиға орнына дереу жеткен Жамбыл облыстық төтенше жағдайлар департаментінің Өрт сөндіру машиналары мен Шу станциясындағы өрт сөндіру пойызының күшімен екі сағатта өрт сөндіріліп, қауіптің беті қайтты.
Телімде барлық пойыздар қозғалысы тоқтатылды.
Соның ішінде 6 жолаушылар пойызы кідірді. Құрбан болғандар мен зардап шеккендер жоқ. Апаттың шығу себебі цистернаның доңғалақ жұбы осінің ортаңғы бөлігінің сынып кетуі деген болжам жасалып отыр.
Оны оқиғаның мән-жайын тергеу бойынша құрылған арнайы комиссия анықтайтын болады.
Оқиға орнында қалпына келтіру жұмыстары жалғасып, ал теміржолшылар пойыздардың қозғалыс кестесін қалпына келтіру үшін барлық мүмкіндіктерді жасады.
Ең алдымен телімнен 12 жолаушылар және 10 жүк пойыздарын өткізу ұйымдастырылды. Кестеден кешіккен пойыздардың жолаушыларына қажетті көмек көрсетілді. Атап айтқанда, Еспе станциясында №44 пойыздың жолаушыларын, жүкті әйелдерді Шу қаласының аудандық ауруханасына тасымалдау ұйымдастырылды.
Станцияларда жолаушыларды ауыз сумен және азық-түлікпен қамтамасыз етуге арналған орындар ашылды. Шу станциясы мен вокзалы басшылығы жолаушылар пойыздарының бригадаларымен бірлесіп билет құнын қайтару және келтірілген қолайсыздықтар үшін өтемақы төлеу секілді мәселелерді шешу бойынша жұмыстарды ұйымдастырды.
Шу станциясының перронында пойыз жолаушыларына биотуалеттер орнатылды және кетуге ниет білдіргендер үшін автокөліктерге отырғызып жіберу ұйымдастырылды.
Жолаушылар пойызының кешіккені үшін айыппұл төлеу жолаушының өтініші бойынша әрбір кідірістің толық сағаты үшін билет құнының үш пайызы мөлшерінде, бірақ билеттің құнынан аспайтын мөлшерде жүргізілетінін атап өту қажет.