Теңіз порттары арқылы 3,4 млн тонна жүк ауыстырып тиелген

Соңғы жылдары елімізде теміржол мен автожол көліктеріне қоса теңіз жолымен тасымалдың да тұсауы кесілгені және ол қарқынды дамып келе жатқаны рас.

Биылғы жылдың өткен 7 айында еліміздің теңіз порттары арқылы 3,4 млн тонна жүк ауыстырып тиелген. Бұл артық-кемі жоқ, өткен жылдың осы кезеңіндегі көрсеткішке тең. Ал теңіз порттарында жүк таситын автокөлік құралдарын ауыстырып тиеу көлемі 100% артты. Яғни, ол көрсеткіш өткен жылы көрсетілген уақыт кезеңінде 3 766 бірлік болса, биыл 7 540-қа жетіп отыр. Сондайақ, контейнерлерді ауыстырып тиеуде де өсім байқалды. Бұл көрсеткіш 16% өсіп, 17 079 бірлікті құрады.

Отандық сауда флотымен осы кезеңде Каспий теңізіндегі порттар арасында 1,32 млн тонна жүк тасымалданды. Оның ішінде 7 910 контейнер Ақтау – Баку фидер желісінің үлесінде.

Жалпы алғанда, биыл бірінші жартыжылдықтың қорытындысында ішкі су жолдары бойынша тасымалдау көлемі 845,1 мың тоннаны құрап, 2019 жылғы көрсеткіштен 65,8% өсті. Оның ішінде 138 мың тонна жүк Ресей бағытында болды.

Сонымен қатар, су жолына да күтім керек екені белгілі. Сондықтан шлюздерді күрделі жөндеу шеңберінде ауданы 6 610 м2 темір-бетон құрылымдарына жөндеу жүргізілген.