«Түйіспесіз жол» айлығы өтуде

Биыл 21 қыркүйек пен 21 қазан аралығында Қазақстан теміржолының барлық жол дистанцияларында «Түйіспесіз жол жағдайы және оны күтіп ұстау» айлығы өтуде. 

Айлық барысында 154-ЦЗ Ережесіне сәйкес түйіспесіз жолдар бойынша журналды жүргізудің дұрыстығы тексеріледі. Сонымен қатар түйіспесіз жол бунақтарында жол машиналарымен жұмыс жүргізу орындарына талдау жүргізіліп, олар туралы деректерді ТЖ журналына енгізу, тозығы жеткен бунақтарды жаңартатын жерлерді тексеру, жол дистанциясы бойынша дәнекерленген түйіспелер саны, телім блогына дейін ұзына бойы дәнекерлеу үшін бунақ жұптары жөнінде түйіспесіз жолдардың жиынтық талдауын жүргізу жұмыстары да осы айлықтың еншісіндегі шаруа. Түйіспесіз жол жұмысын қадағалау бунақтарды бекіткен сәттен басталады. Бүгінде барлық жол дистанциялары айлықты өз деңгейінде өткізуге атсалысуда. 

– Түйіспесіз жолды пайдаланудағы мақсат – жолдың ең әлсіз және күш көп түсетін тұсы болып саналатын рельс түйіспелерінің санын мейлінше азайту немесе жою. Түйіспеліге қарағанда түйіспесіз жолдардың артықшылықтары көп. Атап айтқанда, пойыздар қозғалысында меншікті негізгі қарсылықты төмендету, әйкесінше, тепловоздың отыны мен электр қозғалтқыш бөліктегі электр энергиясы 12-15 пайыз үнемделеді. Сонымен қатар рельс бунақтарының ақаулар бойынша жарамсыз болып қалуы 2 есеге дейін кеміп, соның арқасында жолдың жоғарғы бөлігі ұзақ уақыт қызмет көрсетуге жарамды болады. Міне, осындай және басқа да оң жақтары бойынша қызметін пайдалану үшін түйіспесіз жолдың күтіміне бағытталған айлықтар өткізіліп тұрады, – дейді «ҚТЖ» ҰК» АҚ Магистральдық желі дирекциясы филиалы директорының экплуатация жөніндегі орынбасары Төлеубай Кенжебеков. 

Дистанциялардың бірінші басшылары «Түйіспесіз жолдар қызметін есепке алу» журналының соңғы бетінде жүргізілген тексерудің әрқайсысын белгілеп жазып отырады. Айлық қорытындысында Магистральдық желі дирекциясына жалпы жиынтық есеп беріліп, келесі жылға блокқа дейін бунақты дәнекерлеу жоспары, перегонға дейін бунақты дәнекерлеу жоспары жасалады.