Маңғыстау-Бейнеу пойызының жолсерігінен марихуана тәркіленді
Маңғыстау облысы бойынша меншікті тілші
№657/658 Маңғыстау-Бейнеу жолаушылар пойызының жолсерігінен марихуана тәркіленді. «Сарыарқа» жеке тасымалдаушы компаниясына қарасты пойыз жолсерігі есірткі затын пойыздың жылыту қазандығының есігіне жасырған болып шықты.
Полиция қызметкерлері оны «Робби» атты иттің көмегімен пойыз Бейнеу станциясына келіп тоқтаған кезде тапты. Көлемі 0,87 гр.
− Бізге аталған жолсеріктің есірткі затын қолданады, сақтайды деген мәлімет түсті. Сол ақпарат бойынша жедел әрекет етіп, жолсеріктің қылмысы дер кезінде әшкереленді. Дерек жұмыс барысында, 6 қазан күні анықталды. ҚР Қылмыстық кодексінің 296-бабының 1,2-бөліктерімен іс Бейнеу аудандық сотына жолданды. Сот шешімімен жолсерікке 30 айлық есептік көрсеткіш мөлшерінде айыппұл салынды. Сондай-ақ, ҚР Қылмыстық кодексінің 200-бабы бойынша жолсеріктің жұмыс орнына тиісті ұсыныс енгіздік, – дейді Маңғыстау станциясындағы желілік полиция бөлімі бастығының жедел қызмет жөніндегі орынбасары Қуанышкерей Қызылбаев.
Еске сала кетсек, аталған дерек «Транзит» және «Қара сора» атты жедел профилактикалық іс-шаралары кезінде анықталып отыр.
«Транзит» іс-шарасы бірнеше күнге созылса, «Қара сора» жедел жұмысы бірнеше айдан бері жалғасып отыр. 1 маусымда басталып, осы айдың аяғында аяқталмақ. Осы өткен уақыт аралығында профилактикалық шараның нәтижесінде 5 қылмыстық іс ашылған.