Бейнеу станциясының вагон қараушы бір вагоннан екі ақау тапты

Осы аптада Бейнеу станциясының вагондарға техникалық қызмет көрсету қосынының вагон қараушысы Амангелді Татенов бір вагоннан екі ақау тауып, айды аспанға бір-ақ шығарды. 

Тәжірибелі теміржолшы бүйір рамасы және автоқосылғыштан жарық сызат тауып, болуы мүмкін екі апаттың алдын алды. Станцияның төртінші жолына түстен кейін келіп тоқтаған №2102 пойызды тексеру кезінде Қостанай облысынан Ақтау портына бағыт алған «Рефвагон» кәсіпорнына тиесілі газдалған сусын тиелген вагон арбасынан 470 мм және 520 мм сызаты бар ақаулар анықталды. 

Амангелді Татенов жұмыс істейтін қосында бір ауысымда вагон қараушылар 10-15 адамнан шығып, күндіз-түні вагондар сапасын қарайды. Себебі тоғыз жолдың торабында жатқан Бейнеу станциясында олар бір ауысымда келіп-кететін 15-ке жуық пойыздың вагондарын тексеруге алады. 

– Еңбек жолымды осыдан 6 жыл бұрын Бейнеу политехникалық колледжінде жылжымалы құрамды жөндеу слесарі мамандығы бойынша оқып бітірген соң осы жерде бастадым. Ең басында мені осы станцияға қарайтын Тұрыш бекетіне жіберген. 

Ол жерге пойыздар тоқтамайды, бірақ онда КТСМ құрылғысы бар. Соның жұмысын бақыладық. Қазір станцияның өзіндемін. Вагон қараушыларды «көз рентгені» десе де болады ғой. Біз аса қырағылықпен осындай ақауларды тауып, апаттардың алдын алуымыз керек.

Өзім қалап оқыған мамандығымның иесі болып жүргенім бір бақыт.

Басында 5-разрядты едім, қазір бір саты көтерілдім. Бастысы, теміржолдың қауіпсіздігін сақтай отыра, жұмысымызда абыройлы болу міндет, – дейді Амангелді. 

Вагоншылар үшін бүгінде техникалық сабақтар қазір көбіне онлайн өтеді екен. Ал ішке баратын болса, міндетті түрде арақашықтық сақтай отыра 5 адамнан аспайтындай етіп, сабаққа қатысады. 

Айтпақшы, Амангелдінің анасы да теміржолшы екен, локомотив депосында қызмет етеді. Ал бір інісі «Транстелеком» мекемесінде жұмыс істейді, қысқасы, теміржолшылар отбасы десек, артық емес.