Түрікменстаннан 150-ден астам этникалық қазақтар тарихи Отанына келді

Қазақстан мен Түркіменстан мемлекеттері арасында теміржол ашылғалы биыл алғаш рет жолаушы пойызы шекаралық станция Болашаққа келіп тоқтады. Екі ел арасындағы өзара келісімге сәйкес 153 адам теміржол көлігі арқылы тарихи Отанына жетті. Түркіменстан шекарасындағы Болашақ станциясына түркімен пойызымен жеткен қандастарымызды елге жеткізу жұмысы барлық санитарлық талаптарды сақтай отырып жүзеге асырылды. Олардың ПТР тест сынамасының нәтижесі, денсаулық жағдайлары мен тиісті құжаттары тексерілді. Атажұртқа қоныс аударушыларды Маңғыстау ЖТ бөлімшесі директорының бірінші орынбасары Ерлан Бүркітов, Болашақ станциясы бастығы Мақсат Нұрбеков бастаған теміржолшылар, жергілікті билік өкілдері мен халқы үлкен қонақжайлылықпен қарсы алды. Пойыз жолаушыларына ағарғаны мен бауырсағын, ыстық тамағы мен сусынын алып шықты. Ақсақалдар ата жұртты аңсап келген қандастарға ақ баталарын беріп, ал теміржолшы Ерболат Битиков өлең жолдарын арнады. Ағайын жұрт халықтың ыстық ықыласы мен қолдауына ризашылықтарын білдіріп, қарттары көздеріне жас алды. Бұдан кейін бауырлас ағайындар қазақстандық пойызға мініп, Жаңаөзен станциясына, одан кейін Маңғыстау станциясына жол тартты. Ол жерде де лайықты құрмет пен тиісті қызметтер көрсетілді. Жаңаөзен қаласы мен Мұнайлы ауданы әкімдігінің қызметкерлері бірқатарын туыстарының үйіне, қалғандарын өзге облыстарға шығарып салды. Атап айтқанда, келген 153 адамнан Маңғыстау облысынан Ақтау қаласына 42, Мұнайлы ауданына 58, Түпқараған ауданына 11, Жаңаөзен қаласына 18 адам орналасса, 9-ы Жамбыл облысы, 11-і Алматы, біреуі Ақтөбе облысына, екеуі Шымкент қаласына жол тартты.

– Келетін адамдар көп болғандықтан тексеріс барысында қандастарымызды көп күттірмес үшін станциядағы СЭС мамандары мен шекара қызметінің өкілдеріне қоса облыстан да мамандар шақырттық. Оларды бір күн бұрын дайындап қойдық. Құрамында бір жүк вагоны, тоғыз жолаушылар вагоны бар пойыз үш сағатқа жуық кешігіп келді. Пойыз станция жолына тоқтаған сәттен бастап үш сағат ішінде керекті тексерулер жүргізілді. Жарты сағаттан соң түркімен локомотиві екінші жолдан шығып, кері қайтты. Содан соң ол жолға біздің бес вагон кіргізіліп, тексеруден өткендер сол вагондарға отырғызылды, – деген Болашақ станциясының бастығы Мақсат Нұрбеков, алдағы уақытта тағы осы қарқынмен көрші елде қалған басқа да қандастарымыздың келуі күтілуде екенін жеткізді.