72 отбасы Түркменстаннан атақонысқа оралды
Маңғыстау облысы бойынша меншікті тілші
Түркіменстаннан шыққан арнайы пойызбен көш келді. «Түркіменбашы-Болашақ-Жаңаөзен» бағыты бойынша 218 адам КӨШІ-ҚОН Өзен станциясына жеткізілді, деп хабарлайды Rail-news.kz. Қандастарды пойыздан күтіп алған халық «көш көлікті болсын» айтып, туыстары үйлеріне алып кетті. 19 отбасы Ақтауға, 16 отбасы Жаңаөзенге, 13 отбасы Мұнайлы ауданына, 9 отбасы Маңғыстау ауданына кетсе, 5 отбасы Алматы облысына, 5 отбасы Жамбыл облысына, тағы бір отбасы Қарағандыға қоныстанбақ. Барлығы 72 отбасы елге оралды. Әзірге екі-үш айдай тіркеу жұмыстары жүреді. Бірақ балалары мектеп пен балабақшаға орналаса бермек. Арнайы жолаушылар пойызы «Түркімендемиреллары» МА жасақтаған 14 вагоннан құралған пойыз біздің елдің ішінде «Қазақстан темір жолы» ҰК АҚ демеушілігімен жеткізіліп отыр. Пойызды Болашақтан Өзенге алып келген машинист Рамис Сагитов пен көмекшісі Есқали Қанатбаев. Кері Болашаққа құрамды апарған машинист Эдуард Даулетов, көмекшісі Әділбек Жарылғапов осы бір тарихи оқиғаның куәгерлері болғандарына қуанышты.