ҚТЖ жазғы кезеңде 4 млн-нан астам жолаушыны тасымалдамақ

«Самұрық-Қазына» АҚ алаңында Ұлттық тасымалдаушының жазғы темір жол жолаушылар тасымалын ұйымдастыру және интермодальды тасымалдау жобасын іске асыру бойынша брифингі болып өтті, деп хабарлайды Rail-news.kz. 

Өз сөзінде «Жолаушылар тасымалы» АҚ Бас директоры Жәнібек Тайжанов 2023 жылдың демалыс кезеңінде шамамен 4,5 млн жолаушы тасымалдау жоспарланғанын атап өтті.  

Туристік маусым кезінде жолаушыларға жайлы болуын  қамтамасыз ету үшін Алакөл жағалауына Астана, Алматы, Шығыс Қазақстан және Абай облыстарынан 11 маршрут қатынайтын болады. Елордадан алғаш рет «Астана-Достық» бағыты бойынша «Тальго» жайлы пойызы жөнелтіледі. Құрам  аптасына екі рет жүреді. Жазғы кезеңде Алакөлге өткен жылмен салыстырғанда 30 мың жолаушыны көбірек тасымалдау жоспарлануда.

Спикердің айтуынша, соңғы екі жылда осы бағытта және кері қарай жолаушылар ағыны екі есе (124 мыңнан 243 мыңға дейін)  өсті.  

Көліктік қолжетімділікті жақсарту үшін «Жолаушылар тасымалы» АҚ ҚР ИИДМ-мен, әкімдіктермен, туроператорлармен, әуе және автотасымалдаушылармен бірлесіп ел ішінде интермодальды тасымалдауды (көліктің екі және одан да көп түрін/тасымалдаушыларды пайдалану) ұйымдастыру бойынша жұмыс жүргізеді. Бұл тұрғындардың көліктік қажеттіліктерін қанағаттандыру үшін ішкі тасымалдау жаңа моделінің негізі болады.

Интермодальды тасымалдаудың келесі қызметтерін ұсыну жоспарлануда:

- «ПОЙЫЗ+ПОЙЫЗ» қызметі бір пойыздан екіншісіне ауыса отырып, межелі пунктке дейін жол жүруді көздейді;  

- «ПОЙЫЗ + АВТОБУС» қызметі жолаушыларға вокзалдан үйге дейін трансфер ұсынады;

- «ПОЙЫЗ+ҰШАҚ» қызметі жолаушыларды вокзалдан әуежайға тасымалдау.  

Жолаушылармен кері байланысты жақсарту үшін «Жолаушылар тасымалы» АҚ пилоттық режимде «KTZH_PP_BOT» Телеграмм ботын іске қосты. Осы байланыс арнасы арқылы билетті сатып алу және қайтару туралы қажетті ақпаратты, пойыз кестесін және басқа да анықтамалық мәліметтерді алуға болады.  

Сондай-ақ, жолаушылар 1433 анықтамалық қызметінде және «Жолаушылар тасымалы» АҚ әлеуметтік желілердегі ресми аккаунттары арқылы тегін кеңес ала алады.  

Анықтама үшін:  

Теміржол жолаушылар маршруттарының жалпы саны – 140. Оның 73%-не «Жолаушылар тасымалы» АҚ, ал қалғандарына жеке тасымалдаушылар қызмет көрсетеді.  

Ұлттық тасымалдаушы паркінде 2100 астам жолаушылар вагоны, оның ішінде 108 электр пойызының вагоны бар. Бүгінгі таңда вагон паркінің 50% астамы 11 жылға дейінгі, 17%-і 11 жылдан 20 жылға дейінгі, 32%-і 20 жылдан асқан.

ҚТЖ жолаушылар вагон паркін жаңарту бойынша мақсатты және кезең-кезеңімен жұмыс жүргізуде. 10 жыл ішінде вагон паркі  50% жаңартылды.  2023 жылы 100 жаңа вагон сатып алу жоспарлануда. Ал 2030 жылға дейін Қазақстан мен Швейцария президенттерінің қатысуымен Женевада өткен инвестициялық дөңгелек үстел барысында қол қойылған «ҚТЖ» ҰК» АҚ мен Stadler арасындағы стратегиялық ынтымақтастық туралы келісім шеңберінде тағы 537 жолаушылар вагоның сатып алу көзделген.