Ақтөбеден Мәскеуге пойыз жүреді
Ақтөбе облысы бойынша меншікті тілші
Енді Ақтөбеден – Мәскеуге, Мәскеуден Ақтөбеге дейін жолаушылар пойызы қатынайды. Желтоқсан айының соңғы күндері іске қосылған бағдар жаңа кестемен жұмыс істеп тұр.
Ақтөбе теміржол вокзалы бастығының орынбасары Жанна Иманованың айтуынша, 2024 жылдың желтоқсан айының соңында алғашқы сапарға шыққан жолаушылар пойызы аптасына екі рет қатынайды.
– Жалпы Ақтөбе арқылы бірнеше халықаралық пойыздар қатынайды. «Ташкент-Москва» бағытындағы пойыз аптасына екі рет, бейсенбі және сенбі күндері өтеді. «Москва-Ташкент» кері бағыты да аптасына екі рет, сейсенбі және жексенбі күндері өтеді. Бұл жаңа жылдан бастап өзгерген кесте. Сонымен қатар қазір аптасына екі рет «Бішкек-Москва» бағытына қатынайтын пойыз да бар. Дүйсенбі және бейсенбі күндері жүреді. Кері бағыт дүйсенбі және жұма күндері өтеді, – деді Жанна Иманова.
Бүгінгі күні Ақтөбе вокзалы 15 жұп, яғни 30 жолаушылар пойызын қабылдап-жөнелтеді. Сонымен қатар өткен жылдың соңында «Шалқар-Ақтөбе» бағытына қосымша пойыз қосылған. «Ақтөбе-Шалқар» бағыты бойынша қатынайтын коммерциялық №630/629 пойызы 22 қазаннан бастап күнара жолаушы тасымалын жүзеге асырады.