ҚТЖ «Voice Beyond Horizon» музыкалық реалити-шоуына арнап пойыз жасақтады
«Жолаушылар тасымалы» АҚ Қазақстан аумағында түсірілетін халықаралық «Voice Beyond Horizon» жобасына арнап арнайы музыкалық пойыздың қатынауын ұйымдастырды, деп хабарлайды Rail-news.kz.
Түсірілімдер үшін 7 жолаушылар вагоны мен 1 мейрамхана-вагон бөлінді. Арнайы жасақталған пойыз шамамен 150 өнерпаз бен халықаралық деңгейдегі қонақтарды қабылдауға мүмкіндік береді.
8 қыркүйектен бастап пойыз «Түркістан – Ақтау – Алматы – Астана» бағыты бойынша 18 күндік сапарға шықты. Маршрут аясында ірі қалаларда түсірілімдер мен мәдени шаралар өткізіліп, Қазақстанның туристік әлеуеті мен табиғи көрікті аймақтары кеңінен таныстырылады.
Жоба Қытайдың жетекші медиа-холдингі Hunan Broadcasting System-мен бірлесіп жүзеге асырылуда. Аталған компанияның күнделікті аудиториясы 210 миллионнан астам көрерменді қамтиды, соның ішінде Mango TV платформасы бар. Жобаның басты мақсаты – Қазақстанды халықаралық деңгейде таныту, мәдени әріптестікті нығайту және теміржолды заманауи мәдени алаң ретінде көрсету.
Жобаның атқарушы продюсері – әлемге әйгілі әнші Димаш Құдайберген. Бұл бастама ол үшін символикалық мәнге ие: он жылға жуық уақыт бұрын оның халықаралық мансабы Hunan TV арнасындағы Singer жобасында басталған еді. Енді ол жаңа қырынан – халықаралық музыкалық реалити-шоудың бастамашысы әрі продюсері ретінде қайта оралды.
Жобаға Қытай, Қазақстан, Қырғызстан, Италия, Малайзия және Сербия елдерінің орындаушылары қатысады. Түсірілімдер Астана, Алматы қалаларында, сондай-ақ Алматы, Ақмола, Түркістан және Маңғыстау облыстарында өтеді. Негізгі түсірілім алаңдары ретінде Шарын шатқалы, Бозжыра үстірті, Көбейтүз көлі және Сайрам-Өгем ұлттық паркі таңдалды. Жобаның финалдық кезеңі елорда – Астанада өтпек.
Шоу Hunan TV арнасында, Mango TV цифрлық платформасында, сондай-ақ қазақстандық «Jibek Joly», «Хабар» және өзге де телеарналарда көрсетіледі.