Контейнерлік пойыздар көбейген
2018 жылдың басынан бергі он айда Ұлттық компания бойынша барлығы 3614 контейнерлік пойыз жүріп өткен. Осы ретте 1360 транзитті пойыз Қытай-Еуропа бағытына, ал 1070-і керісінше Еуропадан Қытайға қатынаған.
Бұл көрсеткіште өткен жылдың сәйкес мерзіміне қарағанда біршама өсім бар екені байқалады. Теміржолшылардың мәліметі бойынша «ҚТЖ-Жүк тасымалы» АҚ-да экспорттық бағытта тасымалданатын жүк тасымалы былтырғыға қарағанда биыл он ай ішінде 8 пайызға артып отыр. Оның ішінде жүк жіберу Қытайға – 58 пайыз, Өзбекстанға – 30 пайыз, Түрікменстанға екі есе және Ресейге 1 пайызға көбейген. Ал импорт керісінше өткен жылмен салыстырғанда 4 пайызға төмендеген. Бұл ретте жүктердің келуі Ресейден 6 пайызға, Ақтау порты арқылы 19 пайызға кеміген. Ал Қытай мен Өзбекстаннан, Болашақ станциясы арқылы және Қырғызстаннан келетін импорт артқан. Мамандардың айтуынша, аталған жүк тасымалын қауіпсіз жүзеге асыру үшін жыл басынан бері еліміздің 867,19 км жолын күрделі жөндеу жоспарланса, іс жүзінде бүгінге дейін соның 804,63 км-і жөнделіп біткен. Жөндеу жұмыстары үшін барлығы 668 «толаскез» жарияланыпты.
Компанияның биылғы он айдағы жұмыстарының қорытындысы бойынша жүк тасымалынан күткен табыс 637,8 млрд теңгені құраса, соның ішінде транзиттік бағыттан түсетін табыс 187,2 млрд теңге болады делінген. Бұл бағытта барлық қатынас түрлері бойынша табыстың 12 пайызға өсуі байқалады.
Нұрай СӘРСЕНҒАЛИ