"Жолаушылар тасымалы" АҚ алдағы 10 жылда 1000-ға жуық вагон сатып алмақ
Алдағы он жылда кезең-кезеңімен мың жолаушылар вагоны жаңартылмақ. Бұл туралы осы аптада ауқымды баспасөз брифингін өткізген «Жолаушылар тасымалы» АҚ басшылары мәлімдеді.
Аталған бағыттағы жұмыстары туралы ақпаратпен бөліскен «Жолаушылар тасымалы» АҚ бас директорының орынбасары Едіге Мыханов пен Данияр Нұрмағанбетов, сервис және клиенттермен жұмыс жөніндегі департамент директоры Әлібек Сұлтанов журналистер сұрақтарына да жауап берді.
– Биыл бірінші шілдеден бастап 12 бағытта динамикалық тариф құраушы жүйе іске қосылды. Сөйтіп жолаушылар үшін тиімді тарифпен билет сатып алу мүмкіндігі туындады. Жыл соңына дейін барлық бағыттарға аталған жүйе енгізілмек, – деді Е. Мыханов.
Оның айтуынша, жол жүру құжаттарын алуда қолайлы жағдай жасау және ұйымдастыруды жақсарту шеңберінде epay.railways.kz сайтын жаңғырту, мүмкіндігі шектеулі жандар үшін билеттерді ҚТЖ сайттарында рәсімдеуді жүзеге асыру, жол жүру құжаттары ЖСН бойынша жүзеге асыру, сонымен қатар ірі вокзалдарда өз-өзіне қызмет көрсету нүктелерін ашу көзделуде.
– 9 желтоқсаннан бастап Қарағанды-Томск бағытында халықаралық бағдарды ашқалы отырмыз, ол кезде де БАҚ өкілдерін шақырып, көпшілікті хабардар ететін боламыз. Жаңа жылдан кейін Алматы-Түркістан бағытында да жаңа пойыз ашылмақ, – дейді қоғамның сервис және клиенттермен жұмыс жөніндегі департаменті директоры Әлібек Сұлтанов.
Ал сервистік персонал жұмысына қатысты жолаушыларға қызмет көрсету сапасын арттыру үшін «Эйр Астана» АҚ-мен бірге жеке бас қасиеттерін дамытуға, сервистік персоналды клиентке бағдарлануға қайта бағдарлауға қатысты тренингтер өткізілген. Бұл тренингтер Тұлпар-Тальго пойыздарының бригадалары мен билет кассирлері арасында өткен. Оқу бағдарламалары аясында рейс алдында тренинг өткізетін он нұсқаушы дайындалыпты. Сонымен бірге 211 жолсерік жолаушыларға дәрігерге дейінгі алғашқы медициналық көмек көрсету курсынан өткен. Бұған қоса жұмысқа қабылдар алдында сервистік персоналдың әлеуметтік және психологиялық критерийлеріне басым көңіл бөлінбек. Жолсеріктердің күйзелісі мен шаршағанын басу үшін психолог кабинетін ашу көзделуде.
Қоғам басшылығы үшін халықпен кері байланыс орнатудың маңызы жоғары. Оны қамтамасыз етуге арналған қызметтер аясында 1433 номері бойынша хабарламалар есебін жүргізудің бірыңғай жүйесі іске қосылды. Бұл арқылы жолаушылар қалалық байланыстағы абоненттер бойынша тегін, ал ұялы байланыспен шыққандар ақылы негізде аптаның барлық күнінде, тәуліктің барлық сәтінде соғу мүмкіндігі бар. Сонымен қатар «Төраға блогына» да фото, бейнематериал жүктеуге болады. Әлеуметтік желілерде де парақшалар ашылған. Осындай түрлі жолмен түскен хабарламаларға дер кезінде, нақты жауап беруге баса ден қойылған.
Ұлан ОРАЗ
Суретті түсірген Александр ЖАБЧУК