Өткелде мұқият болыңыз

Қостанай магистральдық желі бөлімшесінде теміржол өткелдерін кесіп өту кезінде құқық бұзушылықтың алдын алу мақсатында профилактикалық жұмыстар толық көлемде жүргізілуде.

Аталған шара аясында теміржол өткелдерінен өтетін көлік иелерімен де, жаяу жүргіншілермен де түсіндіру жұмыстары жүргізілуде. Көлік жүргізушілері көбінесе төмендетілген шлагбаумдарды, қызыл тыйым салу белгілерін және басқа да ескертулерді елемейді, өткелден жылдам өтуге тырысады, оның арты қайғылы жағдайға әкелуі мүмкін.

«ҚТЖ» ҰК» АҚ – «Қостанай магистральдық желі» филиалының жол қозғалысы қауіпсіздігі басқармасының басшысы Талғат Нұрышевтың айтуынша, бөлім қызметкерлері желілік полициямен бірлесіп, осы жылдың басынан бері облыс аумағындағы өткелдерде профилактикалық рейдтер жүргізіп келеді.

Рейд барысында жүздеген жүргізушілер мен жаяу жүргіншілер теміржол өткелдерінен өту ережелерімен кеңінен танысты. Осындай түсіндіру жұмыстары кәсіпорындарда да жүйелі түрде жүргізілуде. Мұнда еңбек ұжымдарымен кездесулер өткізіліп тұрады. Жергілікті ауылдық, аудан, қала әкімдіктеріне де осы мәселе бойынша көмек сұрап хаттар жолданған. Ал теміржол өткелдерінде өту ережелерін еске салатын плакаттар ілінген.

«Бұл шаралардың барлығы, әрине, өз нәтижесін береді. Бұл қажетті профилактикалық жұмыс, біз оны тұрақты түрде жүргіземіз. Оның арқасында өткелдерде болуы мүмкін жол-көлік оқиғаларының алдын алуға болады», - дейді Талғат Нұрышев.