Машинистер арасындағы ару
«Қазақстан теміржолшысы» газетінің тілшісі
Қазалы айналым депосының локомотив бригадалары резервін тәжірибелі теміржолшы Алтынгүл Захарова басқарады. Нәзік болмысты әйел заты болса да алып техниканы бағындырған ерлер қауымына басшылық ететін оған жауапты қызмет сеніп тапсырылған.
Алтынгүл 30 жыл теміржолға қызмет етіп келе жатыр. Төрт жыл бұрын осы қызметке келгенге дейін ол теміржол саласында алған білімінің арқасында мықты тәжірибе мектебінен өтті. Еңбек жолын 1993 жылы депода тасымал құжаттарын өңдеу операторы болып бастап, 1996 жылы есептеу бухгалтері, 1998 жылы жұмыс бөлуші, 2019 жылы Қызылорда локомотив депосы еңбекті нормалау және ұйымдастыру жөніндегі инженері болып жұмыс істеді. Алтынгүлдің жолдасы да өзінің әріптесі, машинист. Төрт ұлы бар, тұңғышы үйленіп, немерелі де болып үлгерген кейіпкеріміз қызметте абыройлы, отбасында аяулы ана, адал жар, сүйікті әже болып отырған нағыз қазақ әйелі.
«Менің міндетім – жолаушылар тасымалындағы локомотив бригадаларына ай сайын жұмыс кестесін жасау, локомотив бригадаларына демалыс беру кестесін бекіту, жыл сайын берілетін еңбек демалысын реттеу, локомотив бригадаларының жұмыс сағатының тең болуын, жұмыс жасау тәртібін қадағалау, локомотив бригадаларын іссапарға жіберу, машинистердің медициналық тексеруден уақытылы өтуіне бақылау жасау. Жұмыс әрине жауапкершілікті талап етеді, әр адамның мінезі әртүрлі, түрлі отбасылық жағдайы бар, соған ыңғайлап кесте түзіп, алдын ала келістіріп, сөйлесе білу керек. Бізге жүктелген тапсырма мүлтіксіз орындалуы үшін бригаданы басқару, жұмысты үйлестіре білу – ең бірінші қажеттілік», – дейді машинистер арасындағы ару.
Алтынгүл Нұртазақызының әкесі де қырық жыл машинист көмекшісі болып еңбек еткен екен. Теміржолшы келіншек болашағын тек осы саламен ғана байланыстырады. Ұлдары ата-анасының ісін жалғаймын десе, қуана құптауға дайын. Себебі темір жол бұл әулеттің өмір жолына айналғалы қашан.