ҚТЖ бойынша 16 соғыс ардагері бар
«Қазақстан теміржолшысы» газетінің тілшісі
Биыл Ұлы Жеңіске – 78 жыл. Жыл сайын қатары сиреп, бүгінде санаулы ғана қалған көзі тірі соғыс ардагерлеріне мәңгі құрмет пен тағзым! «ҚТЖ» ҰК» АҚ бойынша небәрі 16 соғыс ардагері қалыпты. Ұлттық компания тарапынан соғыс және оларға теңестірілген тыл ардагерлеріне барлық тиесілі жеңілдіктер көрсетіліп отыр.
Компанияның Әлеуметтік саясат департаментінің бастамасымен жыл сайын әртүрлі акциялар өтіп, ҰОС ардагерлеріне түрлі сый-сияпат жасалып, азық-түлік себеттері тарту етіліп келеді. Биыл да бұл акция «Ардагер жанымызда» атауымен жалғасын табады. Ардагерлер Отан қорғаушылар күні және Жеңіс күні мерекелеріне орай «Отан қорғаушылар алаңы» монументіне гүл шоқтарын қойып, оларға арналған мерекелік концерттің құрметті қонақтары болады.
Сонымен қатар 2016 жылдан бері «Samruk-Kazyna Trust» қоры тарапынан соғыс ардагерлеріне «Жеңіс» жобасы аясында қолдау көрсетіп келеді. Олардың қатарында теміржолшы ардагерлер де бар. 2022-2023 жылғы «Жеңіс» жобасының бюджеті 115 миллион теңгеден астам соманы құрап отыр.
Орталық ардагерлер кеңесі алға тартқан мәліметке сүйенсек, биылғы сәуір айындағы жағдай бойынша соғысқа қатысқан жоғарыда айтқан 16 адам қалса, соғыс кезінде Темір жол халық комиссариаты қарамағында еңбек еткен 7 адам, блокадада болған 4, концлагерь тұтқыны болған 4 адам бар. Сонымен қатар Компания есебінде Ауған және басқа да соғыс қимылдарына қатысқан 38, Чернобыль АЭС-індегі апат салдарын жоюға – 18 және тыл еңбеккерлері санатында 2495 адам бар екен. Соңғылары соғыс ардагерлерімен теңестірілген санатқа кіріп отыр.
«Қазақстан темір жолы» ҰК» АҚ мен оның еңбек ұжымы арасындағы 2021- 2023 жылдарға арналған ұжымдық шартқа байланысты Жеңіс күні қарсаңында Ұлы Отан соғысына, Қатынас жолдары халық комиссариаттарының арнайы құрылымдарына қатысушы болып табылатын зейнеткерлерге 30 АЕК мөлшерінде материалдық көмек көрсетіледі. Сонымен қатар Отан қорғаушы күніне орай Компания есебінде тұрған зейнеткерлер қатарындағы Чернобыль АЭС-індегі апат салдарын жоюға қатысушыларға және ҰОС қатысушыларына теңестірілген, яғни әскери қызметін Ауғанстанда өтеген зейнеткерлерге 15 АЕК мөлшерінде бір жолғы материалдық көмек көрсетіледі.