Тарлан теміржолшы Қазалының құрметті азаматы атанды
«Қазақстан теміржолшысы» газетінің тілшісі
Жақында Қазалы аудандық мәслихатының кезекті сессиясында Құрметті теміржолшы Қанат Әлмахановқа «Қазалы ауданының Құрметті азаматы» атағын беру туралы шешім бекітілді.
Саналы ғұмырын отандық теміржол көлігінің дамуына сарп еткен ардагер бұл құрметке әбден лайық деседі шәкірттері. Биыл 72 жасқа толатын Қанат Әлдебайұлы әке жолын қуған сүйікті кәсібіне өмірінің 45 жылын арнаған. Бір әкеден тараған 13 баланың ішінде жеті ұл түгел теміржолшы кәсібін таңдаған. 19 жасында локомотив депосында слесарь болып еңбек жолын бастаған кейіпкеріміз 1973 жылы Арыс қаласында машинист көмекшісі курсын бітіріп, тепловозға ауысады. 1975 жылы Қазалыда машинистік курсты оқып, біліктілігін шыңдай түседі. Ташкент теміржол институтында сырттай оқып, жоғары білім алады. 1980 жылы Ақтөбе депосына ауысып, бірнеше жылдан соң депо бастығының орынбасары, 1985 жылы бас инженер, 1987 жылы Ақтөбе теміржол бөлімшесі бастығының локомотив шаруашылығы бойынша бөлім бастығы болады. 1992 жылы Қызылорда теміржол бөлімшесінде бас инженер, 1994-1998 жылдары Батыс Қазақстан теміржол басқармасында локомотив шаруашылығы бастығы болып еңбек етеді. Одан әрі Ақтөбеде жол бөлімшесінде бас ревизор болып, 2017 жылы зейнеткерлікке шығады.
Теміржолшы Әлмахановтар әулетінде саладағы ең үлкен марапат – «Құрметті теміржолшы» атағымен үш адам марапатталған. Жалпы әулеттің теміржолдағы өтілі 300 жылды құрайды.
– Қанат ағамыз талай теміржолшының жолын ашып, білімі мен тәжірибесін үйретіп, ұстаз әрі тәлімгер болды. Қазіргі таңда салада жүрген бір қауым локомотивші мамандар – оның шәкірттеріміз. Қазақстан теміржолының тарихында есімі алтын әріптермен жазылып қалатын тарлан теміржолшының бірі Қанат ағамызды жаңа марапатымен шын жүректен құттықтаймыз! – дейді ардагердің әріптес інісі, Сексеуіл локомотив пайдалану депосы бастығының орынбасары Еркебұлан Аяғанов.