Жүзден жүйрік шықты
«Қазақстан теміржолшысы» газетінің тілшісі
Жастар форумына Сексеуіл локомотив пайдалану депосының машинист көмекшісі Рамил Жұматаев осымен екінші рет келіп қатысты. Жастар саясаты аясында ұйымдастырылған «ҚТЖ-100 жас есім» жобасының жеңімпазы болған ол волонтерлік қызметі үшін ерекше бағаланған.
Қыркүйек айында «Корпоративтік волонтерлар мектебі» атты форумға қатысқан Рамил Сексеуіл – Шалқар, Сексеуіл – Қандыағаш, Сексеуіл – Ақтөбе бағытына қатынап, локомотив бригадасының құрамында еңбек етеді.
– Машинист – мәртебелі мамандық. Ал машинист көмекшісі болу – үлкен жауапкершілікті талап ететін жұмыс. Соның ішінде жолаушылар пойызына және Тальго жүрдек пойызына машинист көмекшісі болу екі есе ұқыптылықты қажет етеді. Он жылдық тәжірибемнің арқасында өз жұмысымды жақсы меңгеріп қана қоймай, осындай қосымша қоғамдық істерге, компанияның бастамаларына да атсалысудамын. Өзім нағыз теміржолшылар отбасынан шыққанмын. Нағашы атам – Құрметті теміржолшы, анам жөндеу депосында еңбек етеді, – дейді Рамил.
Форумға компанияның 35 жасқа дейінгі қызметкерлері қатыса алады. Үздік жүздіктің пулына енген жеңімпаздар оперативті кадр қоры әрі компаниядағы агенттерді алмастырушы болып саналады. Жоба 2019 жылы Қазақстандағы «Жастар жылына» орай іске қосылған еді. Бағдарлама аясында биыл барлығы 4 модульдік оқыту жоспарланған. Биыл бұл жобаға өту шарттары өзгеріп, ол 7 кезеңнен тұрған. Оған өтінім бергендер маусым айынан бастап солардың бәрінен өткен. Рамил де мың адамның ішінен іріктеліп алынған.
– Он үшінші республикалық жастар форумы өте жоғарғы деңгейде өтті. Түрлі тренингтер, сабақтар ұйымдастырылды. Бірқатар тренингтер көпшілік алдында шешен сөйлеуге арналды. Сөйлесу – қарымқатынастың шексіз мүмкіндіктерін ашатын құрал, оны дұрыс пайдалану арқылы адамдар арасындағы байланыстарды нығайтуға болады. Бұл тек ақпарат алмасу ғана емес, сонымен қатар түсіністік орнату, эмоцияны жеткізу, ортақ шешімдерге келу және байланыс нығайту тәсілі. Оның тиімділігі екі жақтың да ашықтығына, тыңдай білуіне, құрмет көрсетуіне байланысты. Жалпы, жан-жақты дамуымызға мүмкіндік берген компания басшылығына зор алғыс айтамыз, – дейді машинист көмекшісі.