Жас өнертапқыштар жобасы

Астаналық оқушылардың өнертабысы теміржол қауіпсіздігін күшейтіп, төтенше жағдайдың алдын алуға сеп болуы мүмкін. Жас өнертапқыштардың жобасын сала мамандары оң бағалап отыр.

Пойызбен жүрген әр жолаушы рельс түйіскен сәттегі соққы дыбысын жақсы біледі. Бірақ оның салдары жайлы екінің бірі біле бермеуі мүмкін. Мәселен, сол соққының әсері темір жолдың тез тозуына, тіпті пойыз қозғалысы кезінде апаттық жағдайлардың туындауына да соқтыруы мүмкін. Осы қауіпті сейілту мақсатында астаналық 11 сынып оқушылары жаңа жоба ойлап тапты. Ол соққыны азайтып, рельстердің беріктігін бұрынғыдан да жақсартуға мүмкіндік береді. Жоба авторы – Дінмұхамед Матай мен Әмір Жәнібек.  

– Біз Алматыға робототехника бойынша олимпиадаға барған жолда пойыз дөңгелектерінің рельс түйіскен жерлерінен шыққан дыбысқа мән бердік. Сол кезде бұл өте қызық көрініп, дыбыстың неден шығатынын зерттей бастадық. Зерттеу барысында барлық рельстерді ауыстыру мүмкін емес, сондықтан олардың арасына арнайы байланыстырғыш бөлшек орнатуды ойлап таптық, – дейді жоба авторы Әмір Жәнібек.  

Екінші автор Дінмұхамед Матайдың айтуынша, жобаның бірінші артықшылығы – жолаушылар қауіпсіздігін арттыру, екіншісі – шу деңгейін төмендету, ал үшіншісі – деформацияның азаюы.  

Жасөспірімдердің «Теміржол рельстерін қосудың инновациялық технологиялары» атты жобасы қазақстандық патентке ие болды. Енді ол Женевадағы халықаралық тіркеуге жолданды.  

Инженерлік тұрғыдан өзекті жоба келешекте кәдеге жарауы мүмкін. Оқушылардың өнертабысымен сарапшылар танысып, ҚТЖ мамандары назар аударып, Магистральдық желі дирекциясының басшылығы инженерлік тәсілді жоғары бағалап, жобаны дамытуға қолдау көрсетуге дайын екенін білдірді. Қол жеткізілген келісімдер аясында «ҚТЖ» жобаны жетілдіру үшін қажетті материалдарды ұсынатын болады. Жол және құрылыстар департаменті тарапынан жобаны іске асыру кезінде оларды үйлестіретін тәлімгер бекітілді.