Саятшылықты серік еткен теміржолшы
Ақтөбе облысы бойынша меншікті тілші
Ақтөбелік теміржолшы Еркін Қалдыбаев бала күнінен тазы баптап, аңшылықпен айналысады. Саятшылықты серік еткен жан үшін бұл жай әуестік емес, атадан мирас болған өмір салты.
Теміржолдағы еңбек жолын 2013 жылы бастаған 32 жастағы жігіт бүгінде Әйтеке би станциясында электромеханик болып еңбек етеді.
«2010 жылдан бері тазы ұстаймын. Тазының өз бабы бар, уақытында тамағын беріп, күтімін жасап, спортшы сияқты үнемі бабында ұстау керек. Мен жұмысыма байланысты үнемі далада, жол аралығында, көбіне жаяу жүреміз. Сондайда қасыма ертіп аламын, маған кәдімгідей серік, оған бой жазатын серуен», – дейді ол.
Еркіннің айтуынша, тазы – тек аң аулайтын ит емес, адамның сенімді серігі.
Қазір оның қолында екі шашақ қазақы тазы бар. Оның аңшылыққа деген қызығушылығы да тегін емес. Әулетінде аңшылық пен тазы баптау дәстүрі үзілмеген. Атасы да, әкесі де тазы ұстаған. Сонымен қатар теміржолшылар әулетін жалғастырушы, атасы, әкесі, тіпті анасы да теміржол саласында еңбек еткен.
«Біз ит құшақтап өскен ұрпақпыз ғой. Тазы баптап, аңға шығу қазақтың жаны. Табиғат аясында ат мініп, тазы ертіп саят құрғаннан асқан рахат жоқ мен үшін, жан тыныштығын табатын ерекше сәт. Қансонарда әке-ағаларыммен бірге аңға шығып, тазы қосу әдісін үйренгенбіз. Менің ең үлкен олжам - елік. Сонымен қатар қоян, түлкі, борсық алған кездер болды», – деді теміржолшы.
Айтуынша, жеті қазынаның бірі тазыға күтім ерекше. Тазы – бекзат аң, кез келген асты жемейді, таза жерде арнайы баптап, дұрыс азықтандыруды қажет етеді.