«Үздік маман» атану оңай емес

Астана белгі беру және байланыс дистанциясының электрмеханигі Жансерік Балмаханов – жиырма жылға жуық тәжірибесі бар теміржолшы. Көп жылғы адал еңбегі үшін «Үздік маман» төсбелгісімен марапатталған. Ал былтыр Ақмола магистральдық желі бөлімшесі басшылығының Алғыс хатын алды.

Қазалыда вагон жөндеуші болып еңбек еткен әкесі Өмірзақтың жолын қуып, Ақтөбеде теміржолдың байланыс саласында білім алған кейіпкеріміз Отан алдындағы борышын өтеп келген соң Астана белгі беру және байланыс дистанциясының ЭЦ-1 постына өз мамандығымен жұмысқа тұрады. Бүгінде ол СОБ, яғни Сигнал беру, орталықтандыру және блокировкалау құрылғыларының үздіксіз жұмысына жауапты маман.  

«Үздік маман» атану үшін ең маңыздысы не деген біздің сауалымызға күліп алған Жансерік күнделікті жұмысы жайлы әңгімеледі.

– Біздің жұмыста жылдамдық өте маңызды, байланыс құралдары мен аспаптарынан табылған ақауларды жылдам анықтап, қалыпты жұмысқа келтіреміз. Күнде таңертең 8.30-да тұрақты түрде еңбек қорғау және қауіпсіздік техникасы нұсқаулығымен танысып, одан әрі технологиялық процесс кестесі бойынша жұмысқа кірісеміз. Күнделікті жұмысты жоспарлау жиналысында күні бойы атқарылатын жұмыстар реті талқыланып, әр қызметкерге нақты тапсырмалар жүктеледі. Сонымен қатар еңбек қауіпсіздігі мен жұмыс тәртібіне қатысты маңызды мәселелер еске салынады. Жоспарлау жиналысынан кейін аға механиктен мақсатты нұсқама аламыз. Нұсқама барысында орындалатын жұмыстардың ерекшеліктері, ықтимал қауіп-қатер және техника қауіпсіздігін сақтау талаптары жан-жақты түсіндіріледі, әр қызметкердің жауапкершілігі нақты айқындалады. Одан кейін өзімізге бекітілген аймаққа барып, жоспарланған жұмыстарды орындаймыз. Жұмыс барысында СОБ құрылғыларының техникалық жағдайы тексеріліп, ақаулар анықталған жағдайда дер кезінде жойылады. Сонымен қатар алдын алу және жоспарлы жұмыстар жүргізіледі. Барлық жұмыстар бекітілген нұсқаулықтар мен қауіпсіздік талаптарын қатаң сақтай отырып атқарылады. Міне, осы міндеттердің бәрін талапқа сай атқарып, өз кәсібіңе адалдық танытсаң еңбегің табысты да болады, үздік те атанасың, – деді кейіпкеріміз.  

Басшылық әрбір тапсырмаға жауапкершілікпен қарап, бағдаршамдар мен бағыттама бұрмалардың үздіксіз жұмысын тексеріп, өз міндетін сапалы әрі уақытылы орындауға тырысатын маманды жоғары бағалайды.  

– Астана станциясы бойынша өзімізге бөлінген аумақтағы теміржолдың байланыс құрылғыларын тексеріп, кез келген ауа райында түзде жүреміз. Мәселен, дүйсенбі жұмысымыз бағыттама бұрмаларын тексеруге арналады, яғни бұрандалары босап кетпеді ме, айналасы бітеліп қалмады ма, қараймыз, қолымызға өзімізбен бірге кілттеріміз бен балғаларымызды, ломдарымызды алып жүреміз. Одан әрі басқа да бізге тиесілі жабдықтардың жұмысын тексереміз. Айына бір рет комиссиялық тексеру болады, сол кезде бағдаршамдардың алыстан қалай көрінетіні қаралады, оның дұрыс көрінуінің өз нормасы бар. Талапқа сай болмаса көрінетіндей етіп баптауын реттеп қоямыз, сонымен қатар перегонда айына бір рет рельс байланыстырушы бөліктер де қаралады, қысқасы пойыздардың қауіпсіз қозғалысы үшін қажетті жағдай туғызумыз керек, – дейді тәжірибелі электрмеханик.  

Қысқасы, «Үздік маман» атану тіпті де оңай емес екенін түсіндік. Төрт баланың әкесі Жансерік Балмаханов үшін өз мамандығын дұрыс таңдап, сол жолда абыройлы еңбек ету – бәрінен қымбат.