Станция кезекшісі

Берікбай Орынбаев – Ақтөбе теміржолына қарасты Дөң станциясының кезекшісі. Станциядағы қозғалыс қауіпсіздігіне жауапты тұлғаны жұмыс орнында жолықтырдық.

Өндіріс аумағындағы екінші класты жүк станциясынан вагондарға хром рудасы тиеліп, жөнелту жұмыстары ұйымдастырылады. Сондай-ақ Хромтау ауданы аумағына жеткізілетін құрылыс материалдары мен жеке фирмалардың тауары да осы жерде түсіріледі. Станция Дөң кен байыту комбинатымен күнделікті байланыста. Күніге 4 пойыз қабылданып, соншасы жөнелтіледі.  

Берікбай аға өз кәсібін жақсы меңгерген және жақсы көреді. Еңбек жолын 1993 жылы жол монтері болып бастапты. Жол шаруашылығында біраз жыл тәжірибе жинап, кейін вагон қараушы болып ауысады. Өз ісіне мұқият, жауапкершілігі жоғары маман болып қалыптасады. 1997 жылы басшылықтың сұрауымен пойыз құрастырушы болып ауысады. «Пойыз құрастырушы қауіпті мамандық, сіз сияқты жауапты маман керек» деген басшылардың сөзін жерге тастамай, алдымен жол, сосын вагон, енді қозғалыс саласын бағындыруға кіріседі.  

Жауапкершілік дегеннен шығады, бір кездері станцияның кәсіподақ ұйымын басқарып, әріптестерінің жоғын түгендеген, уақытша станция бастығының орынбасары міндетін де атқарған. Ұжым алдындағы беделі жаман емес. Әріптестері оны сабырлы, сенімді әрі әділ жан деп бағалайды. Себебі ол тек кәсіби қызметкер ғана емес, ұжымдағы тәлімгер. Барлық салада көп жылдық тәжірибесі бар маманның ақыл-кеңесіне әсіресе жас буын көп сүйенеді.  

«Ауа райы қолайсыз кезде пойыз қозғалысын қауіпсіз ұйымдастыру – қиын да күрделі процесс. Қарлы боран мен қатты аязда станциядағы барлық адам жабылып, көмекке жолшылар да, вагоншылар да келіп, қиындықты еңсерген күндер аз болған жоқ. Сондықтан теміржол жұмысы ұжымдық дер едім. Өз басым қиын жағдайда сабыр сақтап, тәжірибеге сүйеніп шешім қабылдауды құп көремін», – деді Берікбай Түреғазиұлы.