Адамдардың бейғамдығынан жол бойында қайғылы оқиғалар азаймай тұр

Күнделікті күйбең тірліктің көлеңкесінде қарапайым қағидаларды ескере бермейтініміз рас. Ал оның соңы орны толмас өкініш пен қайғылы оқиғаларға әкеліп жатады. Бұл – әсіресе қауіп-қатері басым теміржол бойында өзекті мәселе.

Тараз станциясы желілік полиция қызметкерлері тұрғындарға профилактикалық шаралар өткізіп, оларды қауіп-қатерден сақтандырудан, ескертуден кенде емес. Дегенмен, адамдардың бейғамдығы мен салдыр-салақтығы жол бойындағы қайғылы оқиғаларды азайтпай отыр...  

– Жыл басы қаңтар айында Тараз станциясы кезекшісінен түскен хабарлама бойынша біздің қызметкерлер Тараз-Талас жол аралығына барып, №2493 жүк пойызы адам қағып кеткенін, ол сол жерде қаза тапқанын анықтады. Ал наурыз айында Жуалы ауданындағы Боранды бекетінде де осындай қайғылы оқиға орын алды. Боранды-Сұрым теміржол аралығында отын теріп жүрген 17 жасар жасөспірім құлағына құлаққап киіп алып, артынан келген пойызды байқамай қалған. №1169 жүк пойызының машинисі қанша белгі беріп, дабыл қақса да жасөспірім естімеген. Соңы өкінішпен аяқталды. Сәуір айында Қаратау-Ақтаутас теміржол аралығында №3603 жүк пойызы 1978 жылы туған азаматты қағып кетті. Ал маусым айында Талас станциясының 3520 шақырымында №1275 жүк пойызы 1957 жылы туған азаматты басып кеткен. Өзекті өртеген өкініш – қайғылы оқиғалардың қайталана беруі. Яғни, өткеннен сабақ алу жоқтың қасы, – дейді Тараз станциясы желілік полиция бөлімі бастығының орынбасары Аслан Дүйсенбаев.

Тәртіп сақшысы сонымен қатар болат жолдың бойында жасөспірімдердің «Тик-Ток» түсіріп, әлеуметтік желіге жүктейміз деп арандап қалатын оқиғалар көбейгеніне, жалпы, балалардың қауіпсіздігіне алаңдаушылық білдірді. Мысалы, тамыз айында Тамды-Жұма теміржол аралығында көрші ауылға бармақ болған 7-9 жасар ағайынды екі бала №3607 жүк пойызының вагонына жармасып, жолшыбай секіріп кетіп, бірі ауыр жарақат алса, екіншісі ауруханада көз жұмғаны бүкіл елді дүр сілкіндіргені аян. Қайғылы оқиғалар қашанғы қайталана бермек?