Жолаушылар вагондары мен электр пойыздары қыста жұмыс істеу режиміне көшірілуде

Қазіргі таңда «ҚТЖ» ҰК» АҚ инфрақұрылымы мен жылжымалы құрамдары қысқы мезгілде жұмыс істеуге дайындық үстінде. Бұл бағыттағы жұмыстар 1 қарашада аяқталады.

Тиісті шаралардың жүргізілуін компания басшылығы мен құрылымдық бөлімшелер өкілдерінен құралған арнайы штаб реттеп отыр. Жұмыстың ең басты бағыттарының бірі – жолаушылар тасымалы кешендерін суық маусымға дайындау. Жолаушылар вагондары мен электр пойыздары қыста жұмыс істеу режиміне көшірілуде. Вокзал ғимараттарында жылыту жүйелерін тазалау, қысымын реттеу жұмыстары жүргізілді.  

Қазандықтар мен жылыту трассалары да қысқа дайындалуда. Кесте бойынша жылыту маусымы үшін техникалық және тұрмыстық көмір жеткізіліп жатыр. Теміржолшылар қажеттілігі үшін 20 мың тоннадан астам көмір түсірілді. Қызметтік-техникалық ғимараттар мен электрлендірілген орталықтандыру қосындары тексеріліп, кем-кетігі жөнделуде. Дайындық шеңберінде станциялық шаруашылық бойынша жарық беру жүйелері мен бағыттама бұрмаларының пневма үрлеу құрылғыларына да ревизия жүргізілді.  

Сонымен қатар машиналар мен механизмдерге техникалық қызмет көрсетіліп, жабдықтардың, жанар-жағармайдың қысқы қоры жинақталуда. Тасымал үдерісінің тұрақты жұмысын, қозғалыс қауіпсіздігін қамтамасыз ету үшін тораптар мен локомотивтер жүйесі қысқы режимге көшірілді. Бұған қоса теміржолшылар қысқы жұмыс киімдері және жеке қорғаныш құралдарымен қамтамасыз етілді, барлығы 180 мың дана түрлі киімдер алынды. Сондай-ақ теміржолшылар арасындағы алғашқы қыстаушыларды оқыту мәселесіне де ерекше көңіл бөлініп отыр. Биыл тәжірибелі тәлімгерлерге 5128 «алғашқы қыстаушы» бекітілген.  

Жалпы алғанда 1 қарашаға дейін Қазақстан теміржолында 460 қазандықтың қысқа дайындығы толық аяқталып, 4 мыңдай өндірістік-техникалық ғимаратқа жөндеу жүргізіліп болады. 248 қар тазалау техникасы дайындалады. Қазан айының соңында арнайы комиссия барлық жұмысты тексеріп, қабылдап алады.