Атырауда қызметкерлерді эвакуациялау бойынша жаттығу өтті
Атырау облысы бойынша меншікті тілші
Жуырда Атырау жүк тасымалы және магистральдық желі бөлімшесі ғимаратында апатты жағдайлар бойынша «Өрт кезіндегі әрекет. Қызметкерлерді эвакуациялау» деген тақырыпта жаттығу өтті.
Одан бұрын өндірістік қауіпсіздік және экология мамандарымен оқу-жаттығу кезінде жарақаттанудың алдын алу шаралары жүргізілген болатын. Жаттығуға жүзге тарта қызметкерлер тартылды.
Ғимараттың бірінші қабатында электр қорғанынан өрт шықты деген белгі берілісімен барлық қызметкерлер ауладағы арнайы жиын орнына көшірілді. Өрт пойызының мамандары оқиға орнына шұғыл жетіп, өрт ошағы залалсыздандырылып, қауіп сейілген соң қызметкерлер жұмыс орындарына қайта барды.
«Тілсіз жаудың қашан, қайдан келіп қалғанын білмей қалатын жағдайлар көп кездеседі. Әсіресе үлкен ғимаратта өрт шыққан не басқа бір төтенше жағдай орын алған кезде жүздеген адам қалай әрекет етуі керек, өздерінің және айналасындағылардың қауіпсіздігін сақтау үшін не істемек керек? Осы мақсатта өткен жаттығу шарасына бөлімшедегі барлық қызметкерлер қатыстырылды. Бұл адам өмірі мен қауіпсіздік үшін қажетті жаттығу болды», – дейді Атырау жүк тасымалы бөлімшесінің өндірістік-техникалық бөлім бастығы Әзиз Айжарықов.