Пойыз машинистері шұғыл тежеуді биыл 150 рет қолданған
Жыл басынан бері пойыз машинистері адам басуды болдырмас үшін шамамен 150 рет тежеуді шұғыл түрде қолданды. Мәжбүрлі тоқтаулардың ең көп саны Алматы, Шымкент және Қызылорда өңірлерінде тіркелді, деп хабарлайды Rail-news.kz.
Шұғыл тежеу локомотив бригадасы мен жолаушылардың өміріне немесе денсаулығына қауіп төндіріп, пойыздардың кешігуіне, локомотивтердің, вагондардың бұзылуына әкеледі.
Локомотив бригадаларының жоғары кәсібилігіне қарамастан, 2022 жылдың 10 айында бөгде адамдарды басудың 68 жағдайына жол берілді, оның ішінде 47 жағдай өліммен аяқталса, 21 жағдайда зардап шеккендер әртүрлі дәрежедегі жарақаттармен ауруханаға жатқызылды.
Жазатайым оқиғалардың негізгі себебі - зардап шеккендердің темір жолдарындағы қауіпсіздік ережелерін сақтамауы. Негізсіз асығыстық, немқұрайлылық, бұзақылық, тентектік және теміржолдағы ойындар қайғылы жағдайға әкеледі.
ҚТЖ темір жол көлігі объектілерінің жанында болғанда қырағы болуға, өз өмірін қорғауға және айналасындағылардың қауіп-қатері туралы ескертуге шақырады.