Пойыздардың терезесін таспен атқылау әлі де кездеседі – желілік полиция

Тараз станциясындағы желілік полиция бөлімінің қызметкерлері облыс орталығы аймағында және қала маңында халық тығыз орналасқан Тараз, Талас, Құмшағал, Шөлдала станцияларында жергілікті тұрғындармен жиын өткізді.

Желілік полиция бөлімінің аға инспекторы, полиция майоры Лаура Көпбаева көпшілікке пойыз қозғалысы кезінде шұғыл тежеу жағдайларын, тежегішті іске қосқанмен пойыздың тоқтауы қиын екенін түрлі фактілерді мысалға келтіре отырып түсіндірді. Адамдардан бөлек төрт түлік малдың да теміржол маңында иесіз жайылуы қозғалыс қауіпсіздігіне үлкен қатер төндіретіні аян.  

– Тараз станциясының қызмет көрсету учаскесінде пойыздардың адам басып кету фактілерінің алдын алу, балалардың теміржолдағы қауіпсіз жүріс-тұрыс ережелерін сақтауы, жасөспірімдер қылмыстарының алдын алу, кәмелетке толмағандардың арасында әкімшілік құқықбұзушылықтарды болдырмай – халықпен кездесуде қозғалатын басты тақырыптар. Жасөспірімдердің түнгі мезгілде бейсауат жүруі де олардың түрлі жазатайым оқиғаларға ұшырауына себеп болады, бұзақылықпен жолаушы пойыздарының терезесін таспен атқылау фактілері де жоқ емес, – деді Лаура Көпбаева.  

Желілік полиция қызметкерлері осы станциялар аумағындағы №44,50 орта мектептерінде болып, оқушыларға қауіпсіз жүріс-тұрыс ережелеріне қатысты жаднамалар таратып, бейнероликтер көрсетті. Теміржол қателікті кешірмейді, қауіпті аймақтағы қауіпсіздік ережелеріне тәрбие сағаттарын арнау жөнінде білім мекемелерінің ұстаздарына ұсыныс та айтылды.