Жолды белгіленбеген жерден кесіп өтетіндерге айыппұл салынады

Ақтөбе ферроқорытпа және Ақтөбе хром қоспалары зауыттары секілді ірі жүк жөнелтушілермен тікелей жұмыс істейтін Жіңішке станциясында қауіпсіздік – өткір мәселе. Ал теміржол елдімекенді ортасынан кесіп өтеді.

Бірінші класты станцияға келіп-кетіп жатқан жылжымалы құрам да көп, әрі-бері қатынаған жаяу жүргіншілер қарасы да аз емес. Десек те, белгіленбеген жерден өтуге құмар тұрғындар қауіпсіздікті ескере бермейді. Оның соңы әрине қайғылы жағдайға душар етіп жатады. Станция теміржолшылары желілік полиция қызметкерлерімен бірлесіп апта сайын қауіпсіздік талаптарының сақталуын қадағалау шарасын жүргізеді.  

Бұл жолы арнайы рейдке шығып, алдымен жолды рұқсат етілмеген жерден кесіп өткен тұрғындарды тоқтатып, олармен профилактикалық жүмыс жүргізді, келесі жолы қанша айыппұл төлейтіндерін де жасырмай айтты.  

Құрамында станция бастығының орынбасары Әлібек Жұмабаев пен станцияның инженер-технологы Анар Мұқанова бар арнайы топ станция аумағындағы мектепке барып, оқушылармен кездесті.

Тұрғындар қалашығы, Химик, Махамбет ауданы тұрғындарымен және ондағы мектептерде тағы да түсіндіру жұмыстарын жүргізіп, мұғалімдерге де теміржолды кез келген жерден кесіп өтпеу, жол бойында сақтық шараларын қатаң сақтау туралы оқушылармен ашық сабақтар өткізуге ұсыныс жасады. Оларға алғыс айтқан мектеп басшылығы қауіпсіздік мәселесі тәрбие сағаттарында арнайы тақырыпқа арқау болатынын жеткізді.