Ақтөбе бөлімшесінде 115 теміржол нысаны тексерілді

Ақтөбе магистральдық желі бөлімшесінде күзгі комиссиялық тексеру аяқталды. Теміржол нысандарының қысқы кезеңге дайындығын пысықтаған күзгі комиссиялық байқау қорытындысын талқылаған жиын өтті.

Қыркүйек айының алғашқы аптасында басталған байқауды жүргізген комиссия мүшелері баяндама жасап, тексеру барысында станция-разъездер, жол жағдайы, локомотив пен вагон деполары, тағысын тағы, бөлімше аумағындағы барлығы 115 нысанның қаралғаны айтылды.  

Жауапты мамандардың мәліметінше, екі аптадан аса уақыт ішінде теміржол нысандарының қысқы кезеңге дайындығын пысықтаған дәстүрлі байқау бүкіл шаруашылықты сүзгіден өткізді. Инфрақұрылымның қысқы кезеңге дайындығын, қозғалыс қауіпсіздігі мен техникалық құралдардың жай-күйі тексерілді. Ақтөбе және Орал өңірлеріндегі теміржол нысандары, Қандыағаш пен Жем станцияларында орналасқан кәсіпорындар, техникалық пункттер жағдайы назарға алынды. Жол шаруашылығының жай-күйі, автоматика және байланыс құрылғылары, электрмен жабдықтау жүйелерінің жай-күйі бағаланды. Жылжымалы құрамдар тексеруден өтіп, өндірістік және техникалық нысандардың қыс кезінде жұмыс істеу мүмкіндігіне назар аударылды. Қызметтік өткелдер мен перрондардың жағдайы да назардан тыс қалмады.  

Жұмысшы-қызметкерлердің арнайы киіммен қамтылуы мен шаруашылықтардың қажетті құрал-жабдықпен жабдықталуына ерекше назар аударылып, анықталған кемшіліктерді жоюға уақыт белгіленді. Комиссия еңбек қауіпсіздігі талаптарының сақталуы мен қызметкерлердің кәсіби даярлығына баға берді. Техникалық оқу сабақтарының ұйымдастырылуы мен штат санының жұмыс көлеміне сәйкестігі тексерілді.  

Қызметтік маршруттар жеке бақылауға алынды. Темір жолдан өту орындарындағы төсемдер, «Қызметтік өткел» белгілерінің болуы тексерілді. Тексеру барысында анықталған кемшіліктер тіркелді. Оларды белгіленген мерзімде жою бойынша тиісті жұмыстар жүргізіледі.  

– Қысқы кезеңге дайындық – бірнеше бағытты қамтитын кешенді жұмыс. Инфрақұрылымның, техниканың және қызметкерлердің дайындығы қатар тексеріледі. Қатал қыста пойыздар қозғалысының қауіпсіздігін және теміржол нысандарының тұрақты жұмысын қамтамасыз ету оңай емес. Сондықтан «қыс шанасын жаз сайлау» – теміржолшылар үшін басты қағида, – дейді филиалдың бас инженері Жасұлан Рскалиев.