13 бас малды қағып кетті
«Қазақстан теміржолшысы» газетінің тілшісі
Темір жолға шыққан қараусыз мал пойыз қозғалысына кедергі келтіріп, қауіпсіздікке қатер төндіреді. Осыған байланысты теміржолшылар мен тәртіп сақшылары мал иелерін төрт түлікті бақылауда ұстауға шақырады.
Жыл басынан бері көліктегі полиция департаментінің қызметкерлері пойыздардың шұғыл тежеуіне қатысты 1005 фактіні тіркеді. Оның 746 жағдайы, яғни жартысынан астамы төрт түліктің жолға шығып кетуіне байланысты болған. Кезекті оқиға 13 қыркүйекте Ақмола облысысының Макинка – Елтай аралығында болған. Петропавл – Алматы бағытындағы жолаушылар пойызының машинисі жолында ұсақ малдың жүргенін байқап, шұғыл тежеу беруге мәжбүр болған. Қабылданған шараларға қарамастан пойыз 13 бас малды қағып кеткен. Оқиға салдарынан пойыз қозғалысы 9 минутқа тоқтатылды.
– Көлік полицейлері жануарлардың иесін анықтады. Темір жолдың бөлінген жолағында мал жаю қағидаларын бұзғаны үшін Ақмола облысының 63 жастағы тұрғыны анықталып, әкімшілік жауапкершілікке тартылды, – деді Көліктегі ПД бастығының орынбасары Құрмет Мәжікенов.
Демек, «шығасыға иесі басшы» деген, жауапсыздығы салдарынан ол азамат өсіріп отырған ақ-адал малынан айырылып шығынға батумен қатар, айыппұл арқалайтын болады.