Қозғалыс қауіпсіздігі бойынша техникалық сабақ өтті
Ақтөбе облысы бойынша меншікті тілші
Осы аптада Батыс аймақтағы алты станцияда қозғалыс қауіпсіздігіне тікелей жауапты мамандарға арналған техникалық сабақ өтті.
Батыс аймақтық жүк тасымалы филиалының нұсқаушысы Ақтан Нұржанов алты станцияны аралап, техникалық сабақ өткізіп қайтты. Басты тақырып – өндірісті жұмыс орнында қауіпсіздікті сақтау теориясы пысықталды. Теміржолшылар болған оқиғалардан сабақ алу үшін шынайы мысалдарға жүгінді.
– Темір жолда болып жатқан жағдайлармен тұрақты танысып отырамыз. Басқа жерде болған оқыс жағдайды талқылап, кемшілік қайталанбас үшін шұғыл шара қабылдаймыз. Арнайы тақырыптармен жұмыс істейміз, – дейді Ақтан Нұржанов.
Нұсқаушының сабағы Әйтеке би станциясынан басталды. Оған Никельтаудан Әйтеке биге дейінгі телім қызметкерлері жиналды. Қозғалыс қауіпсіздігі бойынша техникалық сабақ арнайы бекітілген тақырыптармен өтіп, сауатты әрекет ету, ширақ қимылдау ережелері егжей-тегжейлі айтылды. Әрі қарай Никельтау –Әлімбет телімі бойынша жалғасқан техсабақ та осы бағытта өтті. Қандыағаш станциясынан кейінгі ірі жүк жөнелту станциясында қауіптің алдын алудың теориясы жан-жақты талқыланды.
Техсабаққа бас инженерден бастап станция басшысы, ревизор, станция кезекшілері, оператормен қоса вагон құрастырушылар да қатысты. Өткен жылда болған кемшіліктер ескертіліп, болған жайлардан сабақ алу керектігі түсіндірілді.
Келесі техникалық сабақтар алдағы аптада Сексеуіл – Қарашоқат аймағы және Шалқар – Тассай станцияларында өтеді.
