Студенттер қауіп-қатердің алдын алуға атсалысты

Ақтөбе-1 және Ақтөбе-2 станциялары аралығында теміржолшылар әскерилендірілген теміржол күзеті қызметі мен желілік полицияның қатысуымен қауіпсіздік рейдін өткізді. Бұл жолы профилактикалық жұмыстарға еріктілер де тартылды.

Рейдтік іс-шаралар қос станция аралығында шұғыл тежеу оқиғалары жиі тіркелетін тұстарда ұйымдастырылды. Жаяу жүргіншілер мен жақын маңайда тұратын тұрғындарды аралап жүріп, теміржол бойындағы қауіпсіздік, жолдан өту ережелері түсіндірілді. Қоғамдық көмекшілер мен Ақтөбе көлік, байланыс және жаңа технологиялар колледжі студенттерінен құрылған еріктілер теміржолшыларға көмектесіп, көпшілікті қауіп-қатерден сақтандырумен қатар, ескерту парақшаларын таратты. Ақтөбе станциясындағы желілік полиция бөлімінің өкілі Роза Төлегенқызы бірнеше сағатқа жалғасқан рейд жұмысы нәтижелі болуы үшін профилактикалық шараның бәрі жасалғанын жеткізді.  

– Еріктілер қатарындағы студенттер де рейд шараларына қатысу арқылы қауіп-қатерді сезінді. Үлкен әсерде жүрді. Демек, олардың өзі болашақта теміржолда ереже сақтауды есте ұстап, қанша адамды сақтандыруға ықпал ететін болады. Олар айналасымен бөліседі, айтады, – дейді.  

Өткен жылы желілік полиция бөлімі қызметкерлері 2542 азаматқа әкімшілік құқық бұзғаны үшін хаттама толтырған. Сонымен қатар түнгі мезгілде үлкендердің қадағалауынсыз теміржол бойында жүрген 4 жасөспірім бейімдеу орталығына жеткізілген. Өткен жылдың есептік кезеніңде жолаушылар және жүк пойыздарының 84 рет шұғыл тежегіш қолдану дерегі орын алса, оның 23 жағдайында теміржолға кенеттен адам шығып қалуы себеп болған.