Былтыр Ақтөбе аумағында пойыздар 84 рет шұғыл тоқтаған
Ақтөбе облысы бойынша меншікті тілші
Ақтөбеде станция қызметкерлері мен темір жолдың тәртіп сақшылары дөңгелек үстел басына жиналды. Басқосудың басты тақырыбы қауіпсіздік деңгейін арттыру болды.
Өткен жылы Ақтөбе аумағында пойыздардың 84 рет шұғыл тоқтауы тіркелген. Оның 23 дерегі теміржол бойына кенеттен адам шығуына орай қолданылса, 56 жағдайда жолға шыққан малдың кесірінен тоқтаған. Ақтөбе станциясындағы желілік полиция бөлімі бастығының бірінші орынбасары Ержан Төлегенұлының айтуынша, осы шұғыл тежегіш қолдану деректеріне қатысты 46 адам әкімшілік жауапкершілікке тартылған.
«Теміржол бойында жазатайым оқиғаларды және травматизм фактілерін болдырмау үшін станциялар мен қала аумағын бөліп тұратындай теміржол айналасы қоршалып, бақылауда болуы керек. Қажетті жерлерде арнайы өткелдердің қойылуы жөнінде теміржол және жергілікті әкімдік басшыларына талап-ұсыныстар айтылды», – дейді Ержан Төлегенұлы.
Сонымен қатар жиында ҚР ІІМ мен ҚР Индустрия және инфрақұрылымдық даму министрлігі бекіткен «Қазақстан Республикасы темір жолында қауіпсіздік деңгейін және мүліктің сақталуын арттыру бойынша 2022-2024 жылға арналған Жол картасының» талаптары, темір жол көлігінде қауіпсіздікті қамтамасыз ету, жазатайым оқиғалардың алдын алу, қызмет көрсету аумағында және тепловоздарға бейнебақылау камераларын орнатуды көбейту, жүктерді ұрлаудың алдын алу және жол картасы бойынша құрылған жұмыс топтарымен атқарылған жұмыстар талқыланды. Теміржол көлігінде қоғамдық тәртіп пен қауіпсіздікті арттыру бойынша қабылданып жатқан шаралар жан-жақты сөз болды.