32 жылқы шығын болды
«Қазақстан теміржолшысы» газетінің тілшісі
Көкшетау – Жамантұз станциялары аралығында жүк пойызының машинисі жолға шығып кеткен жылқыларды көріп, шұғыл тежегіш қолданып, құрамды тоқтатуға тырысқан.
Бірақ бірден тоқтай қоймайтын алып машина тұяқты жануарларды қағып өте шықты. Ысылдап тоқтағанша жолдың қос қапталында тұяқ серпуге шамасы келмей 32 жылқы жатты...
Бұл туралы Ақмола облысының Көліктегі полиция департаменті хабарлады. Оқыс оқиға салдарынан жүк пойызы 50 минут тоқтап тұруға мәжбүр болған.
«Теміржол төсеміне жылқылардың шығып кетуіне айыпты Игілік ауылының 28 жасар тұрғыны екені Көкшетау станциясында анықталды. Мерт болған бір үйір жылқының ішінде малы болған адамдар жануарларды ауыл тұрғындары кезекпен бағатынын айтты» делінген аталған ведомство таратқан ақпаратта.
Айыпты тарап 5 АЕК мөлшерінде айыппұл төлеген. Бірақ, ішпей-жемей ақ-адал малынан айрылып қалғандардың шығынын кім өтейді? Ал теміржолдың шығынын ше, зақымданып майысқан локомотив, бүлінген жол, уақыт пен электр энергиясы мен жанармай шығыны бар. Бұған дейін осыған ұқсас оқиға ақпан айының басында Ұлытау облысында да болған. Ол кезде жолаушылар пойызы 6 жылқыны қағып кеткен еді. Теміржолшылардың мал-жанның жолға шығуының алдын алу бағытында жүргізіліп жатқан профилактикалық шараларына қарамастан ірі қара малдың теміржол бойында жайбарақат жайылып жүруінің тыйылмай тұрғаны өкінішіті.