Теміржол өткелдеріне камералар орнатылды
«ҚТЖ» ҰК» АҚ – «Магистральдық желі дирекциясы» филиалы «Интер Трейд Систем» ЖШС-мен жүргізушілер жол қозғалысы ережелерін жиі бұзатын теміржол өткелдеріне 10 «Бүркіт» аппараттық-бағдарламалық кешенін орнату бойынша келісім жасасты. Іс-шара теміржолдағы қауіпсіздікті арттыру мақсатында өткізіліп отыр, деп хабарлайды Rail-news.kz.
Талдау көрсеткендей, көбінесе өткелдердегі апаттар автокөлік жүргізушілерінің кінәсінен болып жатады. Құқық бұзушылыққа неғұрлым бейім өткелдерді анықтау үшін 54 теміржол өткеліне зерттеу жүргізілді. Бейнетіркегіштерді бірінші кезекте орнату үшін 10 өткел анықталды.
Пилоттық режимде Астана станциясының екі өткелі бейнебақылау камераларымен жабдықталды. Жаңа-Қарағанды – Майқұдық аралығында және Қарағанөзек станциясының өткелінде тағы екі камера, сондай-ақ магистральдық желінің Алматы бөлімшесі шекараларында: Ақсеңгір – Шамалған, Байсерке – Жетісу, Ақсеңгір – Бұрындай аралықтары мен Байсерке станциясының өткелінде де камералар орнатылды.
Жақын арада магистральдық желінің Жамбыл және Семей бөлімшелерінің аралықтарында бұзушылықтарды тіркеу басталады.