Депо базасында өртке қарсы жаттығу өтті
«Қазақстан теміржолшысы» газетінің тілшісі
Ақмола жүк тасымалы бөлімшесіне қарасты локомотив депосының жөндеу цехында өрт ошағы виртуалды түрде анықталып, «Дабыл» сигналы берілді.
Дереу локомотив депосының кезекшілері телефон және радио арқылы өрт сөндіру бөлімшелерін шақырды. Бұл Ақмола облысы Төтенше жағдайлар департаментінің Көкшетау қаласының локомотив айналма депосының базасында өртке қарсы жауынгерлік әзірлік, барлық құрылымдық бөлімшелердің, Көкшетау станциясы торабы кәсіпорындарының өзара іс-қимылы бойынша өткізген тәжірибелік жаттығулары еді. Жаттығу мақсаты барлық өртке қарсы қалқандардың жұмысын, Көкшетау айналма депосының дабыл беру құрылғыларын және төтенше жағдайлар кезінде қызметкерлердің іс-қимылын тексеру болатын. Жаттығуға Көкшетау станциясының өрт сөндіру пойызы жұмылдырылды. Көкшетау локомотив айналым депосының қызметкерлері бекітілген схема бойынша белгіленген тәртіппен жедел эвакуацияланды. Тілсіз жауды өрт сөндіру бөлімшелері тез арада құрықтады. Оқу іс-шараларының нәтижелері бойынша нысанның өртке төзімділік деңгейі және өртті сөндіруге қатысқан қызметтердің жалпы өзара әрекеттестігі оң бағаланды.