Техникалық кеңесте қауіпсіздік мәселесі қаралды
Тараз қаласы бойынша меншікті тілші
Жамбыл белгі беру және байланыс дистанциясында өткен техникалық кеңес қауіпсіздік мәселесіне арналды. Жиынға дистанциялардың орта буын басшылығы мен жол шеберлері қатысты.
Жамбыл магистральдық желі бөлімшесінің қауіпсіздік бөлімінің басшысы Әбдірахман Ахметов жүргізген жиында негізгі хабарламаны бөлімшенің байланыс жөніндегі жетекші маманы Марат Куликов жасады. Оның айтуынша, 2022 жылы Жамбыл магистральдық желі бөлімшесіне қарасты дистанцияларда құрылғылардың 67 істен шығу оқиғасы орын алған. Оның 44-і мамандардың кінәсінен болған. Барлық оқиғаның алтауы «Альстом» құрылғысынан табылған. 2013 жылы өндіріске енгізілген құрылғыда 4 оқиға жол дистанциясының, 2 оқиға белгі беру және байланыс дистанциясы мамандарының кінәсінен орын алған. Биылғы жылдың еншісінде тағы сегіз оқиға...
– Бізде әлі де болса жол, белгі беру және байланыс, электрмен жабдықтау дистанциясы жұмысшыларының арасында байланыс төмен. Пойыздар қозғалысының кестеден кешігуінің де басты себебі сол, – деді Марат Куликов.
Бұдан соң мамандарға Сарышаған белгі беру және байланыс дистанциясының өндірістік оқыту шебері Жанболат Башиков слайд арқылы теориялық сабақ өткізді. Одан әрі тәжірибелік білімдерін жетілдіру үшін кеңеске қатысушылар жол бойында пойыздар қозғалысын реттеп тұрған Р-80 типті Альстом құрылғысында тәжірибелік сабақ өткізді.