Теміржолдағы жүк қауіпсіздігі сенімді қолда
Ақтөбе облысы бойынша меншікті тілші
Батылдық, қырағылық пен шапшаңдықты меңгерген теміржолдың әскерилендірілген күзет қызметінің сарбаздары – болат жолдың бойындағы қауіпсіздік сақшылары. «Әскерилендірілген теміржол күзеті» ЖШС Ақтөбе филиалының ұжымы шекаралық өткелдің үш мемлекетаралық станциясын бақылайды.
Еуропа мен Азия арасындағы жүк тасымалының қауіпсіздігін қамтамасыз етіп, тиісті нүктесіне мүлтіксіз жеткізілуін ұйымдастырып отырған теміржол әскерилерінің қызметі тәулік бойы жүреді. Озинки, Илецк, Орск станцияларындағы шекаралық өткелдер Ақтөбе филиалының бақылау аумағына кіреді. Сондай-ақ Атырау, Түркістан және Қостанай филиалымен 4 ішкі түйіспедегі пойыздар қозғалысын бақылау да ақтөбелік сарбаздар міндеті. Қызмет көрсету учаскесінің жалпы ұзындығы 2040 км құрайды.
«Қазақстанда ең дамыған көлік түрі болғандықтан жүк тасымалының дені темір жол арқылы ұйымдастырылады. Бір ғасырлық тарихы бар Әскерилендірген теміржол күзеті ел аумағында тасымалданатын жүктердің қауіпсіздігін қамтамасыз етеді. Жүк құрамдарын, мейлі ол контейнерлер, мұнай құйылған цистерналар немесе астық тасымалдайтын вагондар болсын, шекаралық өткелде қабылдап алғаннан келесі бөлімшенің шекарасына дейін ілеспе күзетпен алып барамыз, кері қарай да солай, жүкті шекарадан өткізгенше бүтін
тапсыруымыз керек, Ақтөбе филиалының айырмашылығы – Еуропа-Азияның қиылысқан жерінде, қақпасында тұр», – деді Ақтөбе әскерилендірілген теміржол күзеті филиалының басшысы Сарыбай Сәрсенов.
Филиалдың құрылымы 7 атқыштар командасы мен 2 атқыштар тобынан тұрады. Шалқар, Жем, Қандыағаш, Никельтау, Ақтөбе, Орал, Илецк станцияларындағы атқыштар командалары, Шұбарқұдық, Әйтеке би станцияларындағы атқыштар топтары бар. Сонымен қатар жедел әрекет ететін оңтайлы топ бар. Олар теміржол көлігінде ұрлық пен басқа да құқық бұзушылықтардың алдын алу бойынша жедел-профилактикалық жұмысты жүзеге асырады.
Филиал басшысының айтуынша, олардың қызметінде де теміржол көлігіндегі нұсқамалар басшылыққа алынады. Қызметкерлердің жеке бас қауіпсіздігіне аса мән беріледі. Нұсқаулықтарды қатаң сақтаудың арқасында филиалда бүгінгі күнге дейін қайғылы жағдай болған емес. Өндірістік жарақаттану мен жазатайым оқиғаларға жол берілмеді.
Күзет қызметінде жиі кезігетін қиындықтар да жоқ емес.
«Әсіресе тастанды пойыз мәселесі қиындық туғызады. Тепловоз жетпеу, парктердің қабылдау мүмкіндігі жоқ кезде жылжымалы құрамдар шалғай разъездер мен тұйықтарға қойылады. Ондай жүктерді апталап күзететін жағдайлар болды. Қысты күні аязда, жазда аптап ыстықта жүк тиелген вагондар қауіпсіздігін қамтамасыз етуіміз керек. Осы кезге дейін ұрлық-қарлықты болдырмай, сайыпқыран жігіттеріміздің арқасында өз міндетімізді адал атқарып келдік, қысқасы, жүк қауіпсіздігі сенімді қолда деп айта аламыз», – дейді филиал басшысы.