Жамбылдық теміржолшылар ТЖ кезіндегі дайындықтарын пысықтады

Жамбыл жүк тасымалы мен Жамбыл магистральдық желі бөлімшесінде төтенше жағдай орын алғанда, мысалы жер сілкінгенде, өрт болғанда, т.т. қызметкерлердің қандай әрекеттер, іс-қимылдар жасау керектігі жөніндегі білімдерін пысықтау мақсатында сейсможаттығу өтті.

«Дабыл» қағылған сағат 11.00-де әкімшілік қызметкерлері түгелдей төтенше жағдай кезінде қолданатын баспалдақтар арқылы сыртқа шықты. Эвакуациялау небәрі 10-15 минутта аяқталып, барлығы залалсыздандырылды. Азаматтардың шоғыры әкімшілік ғимараттың алдындағы автокөлік тұрағына жиналды. Тараз станциясындағы желілік полиция бөлімінің қызметкерлері азаматтар мен ғимарат арасын қоршау-бақылауды өз қолдарына алды.  

Жамбыл бөлімшесінің директоры Молдахмет Қожабеков қызметкерлерге төтенше жағдай орын алғанда азаматтардың өзін-өзі қалай ұстау керектігі және қалай қорғану керектігін түсіндірсе, Жамбыл магистральдық желі бөлімшесінің директоры Сұлтан Борамбаев жер сілкінген жағдайда қандай қауіптер қайғылы жағдайға алып келетінін түсіндірді. Ал Жамбыл облыстық төтенше жағдай департаментінің қызметкерлері алғашқы медициналық көмек көрсету, іште қалған азаматтарды қауіпсіз жерге жеткізу жаттығуларын өткізді. Жаттығу шарасы қанағаттанарлық деп бағаланды.

Осындай оқу-жаттығу шаралары Тараз вокзалында да өтті. Нысан стратегиялық болғандықтан мұнда төтенше жағдай және террористік қауіп, табиғи-техногендік сипаттағы жағдай, жер сілкінісі, өрт, су тасқыны кезінде вокзал қызметкерлері мен жолаушылардың қалай әрекет ету керектігі пысықталды.

– Оқу-жаттығу кезінде вокзал қызметкерлері, Желілік полиция бөлімі қызметкерлері де өз дайындықтарының жоғары екенін көрсетті, – дейді Тараз станциясындағы террористік қорғау бөлімінің бас маманы Данияр Ташметов.