Оқушыларды сақтыққа шақырды
Ақтөбе облысы бойынша меншікті тілші
Санаулы күнде оқушылардың жазғы демалысы басталады. Каникул деген жақсы әрине, қызық та жетеді. Бірақ, балалар қауіпсіздігі алаңдатпай қоймайды.
Жіңішке станциясының қызметкерлері кезекті акция кезінде желілік полиция қызметкерлерімен бірге мектептерді аралап, темір жол ережелерін оқушылардың құлағына құйды.
«Темір жолдың қауіпті аймақ екенін үнемі айтамыз. Бұл жерде ойнауға, белгіленбеген жерден өтуге болмайды. Жолда тұрған вагондардың үстіне шығу былай тұрсын, қасына жақындауға қатаң тыйым салынады. Әр адам жеке бас қауіпсіздігін сақтау керек. Темір жол аумағында болып жатқан қайғылы оқиғалардың қарапайым ережелердің сақталмауынан болатынын тағы да қайталап, түрлі мысалдармен түсіндірдік», – деді станция инженері А.Сәуірбаева.
Оқушылармен әңгімелесу кезінде стратегиялық аймақ тәртібі егжей-тегжей түсіндіріліп, ермек үшін темір жолды жағалап, өтіп бара жатқан пойызға тас лақтырып немесе рельске бөгде зат қойып ойнаудың соңы қандай ауыр зардапқа әкеліп соқтыратыны, әке-шешелері қанша айыппұл төлейтіні – бәрі-бәрі айтылды. Жіңішке станциясының теміржолшылары қала тұрғындары мен қонақтарынан темір жол бойында сақтыққа шақырып, жолдан өту ережелерін қатаң сақтауды, балаларды қараусыз жібермеуді сұрайды.
