Атырау темір жолында 150 шақырымға қоршау тартылмақ
Атырау облысы бойынша меншікті тілші
Атырау магистральдық желі бөлімшесіне қарасты теміржол Құрманғазы, Исатай, Махамбет, Мақат, Қызылқоға, Жылыой сынды алты аудан аумағын қиып өтеді. Жолдағы мал аймақ теміржолшылары үшін аса өзекті мәселеге айналғалы қашан.
Атырау магистральдық желі бөлімшесінде жыл сайын жол дистанцияларының өз күшімен теміржол бойын малдан оқшаулау, қоршау, яғни тосқауыл-шарбақ салу жұмыстары жүргізіліп келеді. Бүгінде 300 шақырымда қоршау бар, ол барлық ұзындықтың тек 35 пайыздайы ғана. Соның ішінде Атырау жол дистанциясы бойынша 118 шақырым, Сағыз-Мақат-Атырау-Ганюшкино-рзд. Д.Нұрпейсова учаскесі және Құлсары дистанциясы бойынша Мақат-Құлсары-Бейнеу учаскесінде 106 шақырымды алып жатыр. Бөлімшенің жол шаруашылығы қызметкерлері күшімен 2021 жылы 100 шақырым көлемінде қараусыз малдың теміржолға шығып кетпеуі мақсатында қарсы қоршау салынса, бұл көрсеткіш былтыр жол дистанциялары бойынша 77 шақырым көлемін құраған. Ал 2023 жылға 149,2 шақырым қоршау тұрғызылуы жоспарланып, қазіргі уақытта қолданыстан шығарылған ескі шпалдар қада ретінде орнатылып жатыр, енді оған сым қоршаулар байланады.
– Бұл қоршаулардың айтарлықтай көмегі бар. Мәселен, 2021 жылдың 6 айында пойыздардың 138 шұғыл тежеу оқиғасы орын алған болса, 2022 жылдың 6 айында малдың жолға шығуына байланысты пойыздардың небәрі 17 шұғыл тежеу оқиғасы орын алған. Ал биыл бүгінгі күнге дейін тек 6 оқиға тіркелген. Яғни малдың жолға шықпауына қоршаудан да көмек бар. Алайда, малдың жол бойына шығуының артында апат қаупі, азаматтарымыздың өмірі, экономикалық-материалдық шығындар жатқанын естен шығармағанымыз абзал, – дейді бөлімше басшысының өндірістік мәселелер бойынша орынбасары Аманқос Жылқыбаев.
Аймақта аса қауіпті саналатын жерлер Атырау-Махамбет, Махамбет-Қызылжар, Бақсай-Аққыстау, Құлсары-Шоқпартоғай, Жантерек-Мұқыр-Сағыз, Ганюшкино-Атырау аралықтары.