Маңғыстауда төрт айда шұғыл тежеу 42 рет басылған
Маңғыстау облысы бойынша меншікті тілші
«Айта-айта Алтайды, Жамал апа қартайды» демекші, жолдағы мал – бүгінде жалпы бұқаралық сипатқа айналып кеткен кереғар көрініске айналды. Кейінгі кезде түбек темір жолында жолға мал шығу оқиғасы тағы да жиілеп кеткен. Ал бұл жолшылар үшін нағыз апатқа айналып отыр.
Биылғы жыл басынан бергі өткен төрт айда Маңғыстау жол дистанциясы аумағында тепловоз машинистері 42 рет шұғыл тежеу берген. 6 мал басу оқиғасы тіркеліп, қанша шаруа малынан айрылса, теміржолдың шығыны шаш-етектен...
Былтырғы салыстырмалы мерзімде 29 факті тіркеліп, 1,45 тонна жанар-жағармай ысырап болған екен. Осы жылы тежеулер саны артқандықтан ауаға ұшқан дизельдік отын көлемі де өсіп, шығындалған тепловоз майы 2,10 тоннаға жеткен. Мал басу оқиғалары Бастау-Ақбөбек бекеттерінің, Шетпе-14 бекет, Өзен-Бастау, Боржақты-Қарақия аралықтарында болған. Биылғы 6 жағдайдың тек біреуінде ғана малдың иесі анықталмаған. Қалғандарына қатысты төрт түліктің иесіне Әкімшілік құқық бұзушылық туралы Кодекстің 30-тарау 559-бабы 1-бөлігіне сәйкес ескерту беріліп, айыппұл салынған.
– Өткен жылдары жолға мал шығу оқиғалары сәл де болса азайған еді, 2022 жылдың бастапқы төрт айында тек 4 мал басу фактісі орын алған. Биыл халықтағы мал саны артты ма, жауапкершілік кеміп кетті ме, жедел тежеу жағдайлары көбейіп кетті. Қоршаулар салынып, ескісі жөнделіп, тұрғындарға ескерту мен түсінік жұмыстары жылдағыдай өз жалғасын табуда. Сондықтан басты себеп мал басының артуы деуге болады. Осыған дейін мал иелеріне қатысты 346 адаммен түсінік жүргіздік. Бұл жұмысты жалғастырып, тұрғындарға кеңінен насихаттау және малды арнайы бақташымен бағу туралы ұсыныспен Маңғыстау, Қарақия және Мұнайлы ауданы әкімдеріне хат жолданды. Желілік полиция бөлімшесі, ауыл әкімдігі қызметкерлерімен бірлесе Боздақ, Батыр, Баянды, Емір елдімекендерінің тұрғындарымен де кездестік, – дейді Маңғыстау жол дистанциясының жетекші жол инженері Ержан Артықбаев.
Дистанция өкілінің мәліметінше, биыл 10-11 бекет, ст.Шетпе-13 бекет, 12-13 бекет, 12-11 бекет аралықтарының оң және сол жағына 88,7 шақырым жаңадан мал өтпейтін қоршау құрылысы жүргізіліп жатса, 10-11 аралығына тікенек сымдар орнатылуда екен. Сонымен қатар, дистанция жолшыларының «жолдағы мал жолшының ғана «бас ауруы» ма, неге барлық ауыртпалық пен жауапкершілікті біз ғана арқалап, күндіз-түні кезекшілікпен жол бойын төрт түліктен қоруға тиіспіз? Тек түбек емес, бүкіл ел өңірлеріндегі жолшыларға артық жұмыс жүктеп отырған келеңсіз мәселе қашан оң шешімін табады?» – деген жанайқайын да жеткізді.
Маңғыстау жол дистанциясы қызмет көрсететін телім бойындағы елді мекендер, ауыл әкімдіктері бұған не уәж айтар екен?