Теміржолда 25 бас ұсақ мал шығын болды
Ақтөбе облысы бойынша меншікті тілші
«Сарысай-Хромтау» станциялары аралығында жол бойында жайылып жүрген ұсақ малды байқаған жүк пойызының машинисі дереу шұғыл тежегіш қолданды.
Бірақ амал қанша, оңайшылықпен тоқтай қоймайтын ұзын құрам 25 бас қой-ешкіні қағып-басып өте шықты... Жылжымалы құрамның астына түскен 20 бас ұсақ мал арам өліп, тірі қалған 5 басты иесі жол бойында сойып алған. Оқиға пойыздар кестесіне кедергі келтірмеген.
Қандыағаш станциясының желілік полиция бөлімінің мәліметінше, әкімшілік құқықбұзушылық кодексінің 559-бабы 1-бөлігіне сәйкес малын қараусыз қалдырған Сарысай ауылының 64 жастағы тұрғынына 5 АЕК көлемінде айыппұл салынған. Ақ-адал малынан бір айрылып, айыппұл төлеп екі шығынға батқан тұрғынға обал-ақ. Бірақ, шығасыға иесі басшы деген осы.
Темір жол бойында төрт түлік мал мен бөгде адамдардың көп жүруі қозғалысқа қауіп төндіріп, жүк және жолаушылар пойызына кедергі келтіруі азаяр емес.
Қандыағаш станциясы қызметкерлерінің айтуынша, мал басу оқиғаларының алдын алу үшін шаруашылық иелерімен жиі түсіндіру жұмыстары жүргізіледі. Бірақ немқұрайлық пен бейқамдықтың кесірінен өзіне де, өзгеге де залал келтірушілер аз емес.