Биыл Ақтөбе аумағында шұғыл тежеу 15 рет қолданылған
Ақтөбе облысы бойынша меншікті тілші
Темір жол бойына жақын орналасқан елдімекен тұрғындарына қауіпсіздік ережелерін ескерту – теміржолшылар мен желілік полиция қызметкерлерінің міндетіне айналғалы қашан.
Жаз басталғалы түсінік жұмыстары күшейе түсті, себебі каникулға шыққан мектеп оқушылары көбейген. Күні кеше Ақтөбе станциясында кезекті рейд өткізген теміржолшылар мен тәртіп сақшылары аптап ыстықта жол жағалап, теміржол бойында қауіпсіз жүріп-тұру ережелерін ескерту жұмыстарын жүргізді. Рейд кезінде жолды кесіп өтуге оқталған жалаушылар тоқтатылып, ауызша ескерту жасалды. Екінші жолы оларға айыппұл салынатыны да ескертілді.
Ақтөбе станциясының басшысы Нұрлан Ермағамбетовтің берген мәліметінше, жыл басынан бері Ақтөбе станциясында 34 рейдтік шара өтіп, темір жол бойының қауіптілігін ескерткен 625 буклет таратылған. Темір жолды белгіленбеген жерден кесіп өткен 556 әкімшілік-құқық бұзушылық анықталған.
Сонымен қатар, рейдтік шара барысында 25 жасөспірімнің ата-анасы шақыртылып, беймезгіл уақытта жалғыз-жарым жүргені үшін түсінік талап етілді.
«Жыл басынан бері Ақтөбе аумағында жылжымалы құрамды 15 рет шұғыл тоқтату жағдайы тіркелді. Оның алтауында жол бойына мал шықса, қалғаны адамның қатысуымен болған», – деді Ақтөбе станциясы желілік полиция бөлімі бастығы Айтұрған Елеусізов.
