Атырау жүк тасымалында биыл қанша жазатайым оқиға орын алғаны белгілі болды
Атырау облысы бойынша меншікті тілші
Темір жолда ең басты ұстаным – қауіпсіздікті сақтау. Темір тәртіпке бағынған салада қауіпсіздік – әр теміржолшының қанына сіңген қасиет десек жаңылыспаймыз. Әрине, өндірістік салада бәрі мінсіз болуы мүмкін емес, қауіпсіздікке қатер төнетін жағдайлар жеткілікті.
Қауіпсіздік пен еңбек қорғауды қамтамасыз ету мақсатында басшылар тарапынан кенеттен тексеру жүргізу, станцияларда жұмысшылармен технологиялық процесті, қауіпсіздік техникасының ережелерін сақтауды қадағалау жұмыстары үнемі жүргізіліп отырады. Алты айда барлығы 36 кенеттен тексеру өткен. Оның барысында арнаулы киімсіз жүрген 11 жағдай, еңбек тәртібін бұзу 14, лауазымдық нұсқаулықты бұзу 8, қауіпсіздік техникасын бұзудың 5 жағдайы анықталып, оларды түзетуге нұсқау берілді.
– Бөлімшеде еңбек жағдайы мен қауіпсіздікті арттыру бағытында кешенді жоспарға сәйкес 11 іс-шара жоспарланып, оған 353887,35 мың теңге бөлінген. Еңбек жағдайына аттестация жүргізу барысында 458 жұмыс орны аттестацияланған. Сонымен қатар 1707 адам ауаның газдануы, физикалық және шулы жерде т.т. зиянды және ауыр еңбек жағдайында жұмыс істейді. Сонымен қатар, бөлімше бойынша қауіптілігі жоғары 62 нысан бар, олар крандар, қысыммен жұмыс жасайтын құрылғылар, электр қазандары, т.б. Биылғы жарты жылда қауіпті саналатын техникалық қондырғыларда апатты жағдай болған жоқ. Қысқасы, қауіпсіздікті қамтамасыз ету – өз қолымызда, оған тек жағдай жасау керек,– дейді бөлімшенің қауіпсіздік және еңбек қорғау бөлімінің бастығы Салтанат Нұрсұлтанова.
Биылғы жарты жылда Атырау жүк тасымалы бөлімшесі бойынша 2 жазатайым оқиға орын алыпты. Біріншісінде машинист байқаусызда аяғын ауыртып алған болса, екінші жағдайда жүк қабылдап-жөнелтуші қызметтік міндетін атқарып жүрген кезінде қаңғыбас иттер шабуылдап талаған. Екі жағдайда да жұмысшыны кінәлай алмайсың, сондықтан қауіпсіздікті сақтамады деп айып тағу да орынсыз секілді. Екі оқиғада да қозғалыс қауіпсіздігіне нұқсан келген жоқ, ал жұмысшылардың емделуіне жағдай жасалды.
Әрине, темір жол саласындағы қауіпсіздікті сақтауда алдын алу шараларының алатын орыны ерекше. Соған сәйкес, орын алған төтенше оқиғаларды жедел зерттеу, қауіпсіздік мәселесіне жанама әсер ететін нақты регламенттерді, жұмыс барысына сапалы мониторинг жүргізді қатаң түрде сақтаудың маңызы зор.
Қауіпсіздікті сақтауда практикалық сабақтардың тиімділігі жоғары болатыны сөзсіз. Бұл бағытта қауіптілігі аса жоғары аймақта жұмыс істейтін жұмысшыларға қауіпсіз еңбек ету іс-тәжірибесін көрсету бойынша сабақтар өтіп, оған пойыз құрастырушылар, белгі беруші, жүк қабылдаушылар қатысқан. Теміржолшылардың дені ашық далада, күннің бетінде, желдің өтінде жүретіні белгілі. Сол бағытта еңбек гигиенасы, суықта қалай жүру, ыстықта өзін қалай ұстау, қатты жел кезінде қалай әрекет ету мысалдары да қажетті дүниелер. Ол бойынша да бюллетендер таратылып, сабақтар өтіп тұрады. Еңбек жағдайын жақсарту мақсатында Ганюшкино, Атырау, Ақжайық, Теңдік, Қарабатан, Сағыз, Құлсары, ВЧДЭ-1 Атырау бекеттерінде ас ішу бөлмелері жабдықталып, барлық қажеттілік жасалған.
Өрттен сақтану, экология, өндірістік және өнеркәсіптік қауіпсіздік бойынша да қажетті шаралар жүзеге асырылып келеді. Соның ішінде өрттен сақтану шаралары бойынша 252 ескерту беріліпті, бірақ оларды түзету баяу жүріп жатыр екен. Ал, көмірмен жанатын жылыту қазандарын электрлендіріліген түріне ауыстырғаннан кейін ауаны ластау әлдеқайда азайған. Станцияларда «Қауіпсіздік диалогы», «Өндірістік қауіпсіздіктің он екі негізгі ережесі», т.б. тақырыптарда көрнекі жадынамалар ілінген. Ал жазғы-қысқы арнаулы киіммен және арнайы қорғаныс құралдарымен бөлімше жұмысшылары 100 процент қамтамасыз етілген.